پانچواں ٹی ٹونٹی: سنسنی خیز مقابلے میں انگلینڈ کو شکست، پاکستان 6 رنز سے کامیاب
پاکستان نے انگلینڈ کو پانچویں ٹی ٹونٹی میچ میں دلچسپ مقابلے کے بعد6رنز سے شکست دے کر سیریز میں 3-2 کی برتری حاصل کرلی ہے۔انگلش ٹیم 146 رنز کے ہدف کے تعاقب میں 7 وکٹوں کے نقصان پر 139 رنز بنا سکی۔ معین علی نے 51 رنز کی اننگز کھیل کر میچ کو سنسنی خیز بنایا تاہم وہ اپنی ٹیم کو فتح دلانے میں ناکام رہے۔ محمد رضوان کو 63 رنز کی ذمہ دارانہ اننگز کھیلنے پر پلیئر آف دی میچ قرار دیا گیا۔
بدھ کو قذافی سٹیڈیم میں کھیلے گئے 7 میچوں کی سیریز کے پانچویں ٹی ٹونٹی میں انگلش ٹیم کے کپتان معین علی نے ٹاس جیت کر پہلے فیلڈنگ کا فیصلہ کیا جو ان کیلئے مہنگا ثابت ہوا۔ میزبان ٹیم پہلے بیٹنگ کرتے ہوئے 19 اوورز میں 145 رنز پر آئوٹ ہوگئی۔ گرین شرٹس کی اننگز کا آغاز اتنا اچھا نہ رہا جب کپتان بابر اعظم 12 گیندوں پر 9 رنز بنا کر آئوٹ ہوئے۔ قومی ٹیم کی دوسری وکٹ 42 کے مجموعی سکور پر گری جب شان مسعود 7 رنز بنا کر پویلین لوٹ گئے۔
.@iMRizwanPak showed his consistency with another excellent knock 👏#PAKvENG | #UKSePK pic.twitter.com/wqTKHhF8kj
— Pakistan Cricket (@TheRealPCB) September 28, 2022
اس کے بعد قومی ٹیم کا مڈل آرڈر ایک بار پھر رنز بنانے میں ناکام رہا۔ پاکستان کے 7 بیٹرز ڈبل فگر میں بھی داخل نہ ہو سکے۔ حیدر علی 4، افتخار احمد 15، آصف علی 5 اور محمد نواز صفر پر آئوٹ ہوئے۔ شاداب خان 7، اپنا ڈیبیو میچ کھیلنے والے عامر جمال 10 رنز بنا سکے۔ ایک طرف مسلسل وکٹیں گرنے کا سلسلہ جاری رہا جبکہ دوسرے اینڈ پر محمد رضوان نے ذمہ داری سے بیٹنگ کا سلسلہ جاری رکھا، وہ 63 رنز بنا کر آئوٹ ہوئے۔
انگلینڈ کے فاسٹ بائولر مارک ووڈ نے 20 رنز کے عوض 3 وکٹیں حاصل کیں۔ ڈیوڈ ویلی اور سیم کرن نے دو دو جبکہ کرس ووکس نے ایک کھلاڑی کو آئوٹ کیا۔ 146 رنز کے ہدف کے تعاقب میں انگلینڈ کی ٹیم 7 وکٹوں کے نقصان پر 139 رنز بنا سکی۔
Nerves of steel! 🤩
Debutant Aamir Jamal stars with a remarkable last over 👏#PAKvENG | #UKSePK pic.twitter.com/tsZ1KQtg9v
— Pakistan Cricket (@TheRealPCB) September 28, 2022
کپتان معین علی کی 51 رنز کی ناٹ آئوٹ اننگز بھی انگلینڈ کو فتح سے ہمکنار نہ کرا سکی۔ ان کی اننگز میں 4 چھکے اور دو چوکے شامل ہیں۔ انگلش ٹیم نے بھی اپنی اننگز کا مایوس کن انداز میں آغاز کیا جب اس کے اوپنرز فل سالٹ 3 اور ایلکس ہیلز ایک رن بنا کر پویلین لوٹ گئے۔
انگلینڈ کی تیسری وکٹ 31 کے مجموعی سکور پر گری جب بین ڈکٹ 10 رنز بنا کر محمد وسیم کے ہاتھوں آئوٹ ہوکر پویلین لوٹ گئے جبکہ 62 کے مجموعی سکور پر ہیری بروک 4 رنز بنانے کے بعد پویلین لوٹ گئے۔ اس کے بعد سیم کرن نے کپتان معین علی کے ساتھ مل کر سکور کو آگے بڑھانا شروع کیا تاہم کچھ دیر بعد سیم کرن 17 رنز بنا کر آئوٹ ہوگئے۔
.@iMRizwanPak is named player of the match for his outstanding 63 to anchor the 🇵🇰 innings 🏆#PAKvENG | #UKSePK pic.twitter.com/bscDfnpw6q
— Pakistan Cricket (@TheRealPCB) September 28, 2022
انگلینڈ کو آخری اوور میں فتح کے لئے 15 رنز درکار تھے تاہم اپنا ڈیبیو میچ کھیلنے والے نوجوان عامر جمال کی بہترین بائولنگ کی بدولت انگلش ٹیم فتح اپنے نام نہ کر سکی۔ پاکستان کے فاسٹ بائولر حارث رئوف نے دو، محمد نواز، محمد وسیم، شاداب خان، افتخار احمد اور عامر جمال نے ایک وکٹ حاصل کی۔
