برازیلین فٹ بال کھلاڑی جنسی زیادتی کے جرم میں گرفتار

برازیلیہ:(ویب ڈیسک) برازیل کی قومی فٹ بال ٹیم کے سابق کھلاڑی روبینہو کو جنسی زیادتی کے الزام میں گرفتار کر لیا گیا ہے۔

روبینہو کودو سال قبل اٹلی میں 2013ء میں میلان کے نائٹ کلب میں ایک البانوی خاتون کے ساتھ اجتماعی عصمت دری میں کردار ادا کرنے پر سزا سنائی گئی تھی۔ برازیل کے سابق کھلاڑی جن کی عمر 40 سال ہے، کو سینٹوس شہر میں ان کے اپارٹمنٹ سے گرفتار کیا گیا، جو ان کا آبائی شہر بھی ہے۔

اطالوی حکومت نےروبینہوسے برازیل میں اپنی سزا پوری کرنے کی درخواست کی تھی جب ان کی حوالگی کی درخواست ناکام ہو گئی۔ بدھ کے روز، برازیل کی ایک عدالت نے اس فیصلے کو برقرار رکھا اور فیصلہ دیا کہ ان کو نظر بندی کے بجائے جیل میں اپنی سزا کاٹنا چاہیے۔

جمعرات کو برازیل کی سپریم کورٹ کے جج نے ان کی گرفتاری روکنے کی درخواست مسترد کر دی۔ برازیل کے نظام انصاف کے فیصلہ کن اقدام کو مقامی میڈیا نے سراہا ہے۔ انہیں خدشہ تھا کہ روبینہو اپنی شہرت کی بدولت انصاف سے بچ جائیں گے۔

برازیل کا یہ سابق بین الاقوامی کھلاڑی، جس نے اپنے ملک کے لیے 100 کھیل کھیلے ہیں، جرم کے وقت میلان کلب کی ٹیم کے لیے کھیل رہا تھا۔جرم ثابت ہونے کے بعد، وہ 2020 ءمیں ایک اپیل ہار گئےتھے۔ یہاں تک کہ اٹلی کی اعلیٰ ترین عدالت نے 2022 ء میں اس کی سزا کو برقرار رکھا، جس کے بعد اطالوی استغاثہ نے ان کے لیے بین الاقوامی گرفتاری وارنٹ جاری کیا۔

دو سال تک مانچسٹر سٹی کے لیے کھیلنے والے فٹبالر نے اتوار کے روز برازیل کے ایک چینل سے بات کرتے ہوئے کہا کہ انھیں جس جنسی تعلق کی سزا سنائی گئی ہے وہ ’اتفاقی‘ تھی۔