وزیرِاعظم شہباز شریف کو کویتی ہم منصب کا فون، عید کی مبارکباد

اسلام آباد: (سنو نیوز) وزیرِ اعظم شہباز شریف سے کویت کے وزیرِ اعظم شیخ محمد صباح السالم الصباح کا ٹیلیفونک رابطہ ہوا جس میں عید الفطر کے موقع پر مبارکباد پیش کی گئی۔

وزیر اعظم آفس سے جاری کردہ بیان میں بتایا گیا ہے کہ وزیرِ اعظم شہباز شریف کو کویت کے وزیرِ اعظم نے ٹیلی فون کر کے عید کی مبارکباد پیش کی۔ ٹیلیفونک رابطے میں پاکستان اور کویت کے مابین دیرینہ و تاریخی برادرانہ تعلقات کو اجاگر کرتے ہوئے دوطرفہ تعلقات کی مضبوطی اور تعلقات کو دونوں ممالک کے عوام کے لیے باہمی طور پر مفید شراکت داری میں بدلنے کے عزم کا اعادہ کیا گیا ۔

گفتگو کے دوران وزیرِ اعظم محمد شہباز شریف نے اپنے انتخاب کے موقع پر کویتی قیادت کی جانب سے تہنیتی پیغام کا ذکر کرتے ہوئے کویتی وزیرِ اعظم کو شکریہ ادا کیا۔

یہ بھی پڑھیں

آسٹریلیا کا فلسطین کو الگ ملک تسلیم کرنے کا عندیہ

وزیرِ اعظم نے نہ صرف پاکستان اور کویت کے مابین اقتصادی اور تجارتی تعاون کے فروغ کی ضرورت پر روز دیا بلکہ پاکستان کی جانب سے گزشتہ برس دونوں ممالک کے درمیان دستخط شدہ معاہدوں اور مفاہمتی یادداشتوں پر جلد عملدرآمد کی یقین دہانی کروائی۔

دونوں رہنماؤں نے پاکستان اور کویت کے عوام کی سلامتی اور خوشحالی، امتِ مسلمہ کے مابین بھائی چارے اور بالخصوص نہتے فلسطینی بہن بھائیوں پر جاری اسرائیلی ظلم و جبر کے خاتمے کی دعا کی۔

کویت کے وزیرِ اعظم نے پاکستان کے عوام کے لیے نیک خواہشات کا اظہار کرنے کے ساتھ ساتھ کویتی حکومت کی جانب سے پاکستان کے ساتھ تعاون کے مزید فروغ کی خواہش کا اظہار کیا۔