سیکیورٹی فورسز کی شمالی وزیرستان میں کارروائی، چھ دہشتگرد جہنم واصل

راولپنڈی:(ویب ڈیسک) سیکیورٹی فورسز نے خیبر پختونخوا کے علاقے شمالی وزیرستان میں آپریشن کرکے وطن کے چھ دشمنوں کو جہنم واصل کر دیا ہے۔

پاک فو ج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان میں انٹیلی جنس بیسڈ آپریشن 3 اور 4 مئی کی شب دہشتگردوں کی موجودگی کی خفیہ اطلاعات کی بنیاد پر کیا۔

سیکیورٹی فورسز اور دہشتگردوں کے مابین فائرنگ کے تبادلے میں 6 دہشتگرد جہنم واصل ہو گئے۔ آئی ایس پی آر کے مطابق آپریشن کے دوران دہشتگردوں کا ٹھکانہ تباہ کر دیا گیا ۔

ہلاک دہشتگرد سیکیورٹی فورسز اور معصوم شہریوں کے خلاف متعدد کاروائیوں میں ملوث تھے ۔

علاقہ میں ممکنہ دہشت گردوں کے خاتمے کے لیے کلیئرنس آپریشن جاری ہے۔ سیکیورٹی فورسز ملک سے دہشتگردی کی لعنت کے خاتمہ کے لیے پرعزم ہیں۔