ایران کا بحرین میں امریکی ریڈار پر ڈرون حملے کا دعویٰ
ایرانی سرکاری نشریاتی ادارے پر جاری بیان میں پاسدارانِ انقلاب نے کہا کہ ان کی ایرو اسپیس فورس نے بحرین کے الرفاع ہیلی کاپٹر بیس پر نصب امریکی فضائی دفاعی ریڈار سسٹم کو نشانہ بنایا۔
بیان کے مطابق اس کارروائی میں چھ ڈرونز استعمال کیے گئے، تاہم حملے سے ہونے والے نقصانات اور امریکی ریڈار سسٹم کی موجودہ صورتحال کے حوالے سے آزادانہ طور پر تصدیق سامنے نہیں آئی۔
دوسری جانب بحرین نے سوشل میڈیا پلیٹ فارم ایکس پر ممکنہ خطرات سے متعلق دو الگ الگ انتباہات جاری کیے ہیں۔ ستمبر کے بعد یہ پہلا موقع ہے کہ بحرینی حکام کی جانب سے اس نوعیت کے انتباہات جاری کیے گئے ہیں۔
بحرینی وزارت داخلہ نے شہریوں سے اپیل کی ہے کہ وہ پرسکون رہیں اور صورتحال سے متعلق معلومات کیلئے صرف سرکاری ذرائع اور سرکاری چینلز پر انحصار کریں۔
ادھر سعودی عرب میں قائم امریکی سفارت خانے نے مشرق وسطیٰ میں موجود امریکی شہریوں کو اضافی احتیاط برتنے اور سکیورٹی صورتحال پر نظر رکھنے کی ہدایت کی ہے۔
یہ بھی پڑھیں:بھارت میں خوفناک تصادم، 26 افراد ہلاک
سفارت خانے کے مطابق حوثی حملوں اور ایران کی جانب سے دی جانے والی دھمکیوں کے پیش نظر امریکی شہری اپنے اردگرد کے حالات سے باخبر رہیں اور ضروری حفاظتی اقدامات اختیار کریں۔
خطے میں حالیہ پیش رفت کے باعث خلیجی ممالک میں سکیورٹی خدشات بڑھ گئے ہیں۔
