ایران کا کویت پر میزائل حملہ
کویتی حکام کے مطابق ایران کی جانب سے میزائل اور ڈرون حملوں کی اطلاعات موصول ہونے کے بعد ملک کا فضائی دفاعی نظام فوری طور پر متحرک کردیا گیا۔ دفاعی نظام نے کارروائی کرتے ہوئے آنے والے میزائلوں اور ڈرونز کو کامیابی سے ناکام بنا دیا۔
حملے کے حوالے سے مزید تفصیلات جاری نہیں کی گئیں، تاہم کویتی حکام نے ایرانی کارروائی کو جارحیت کا حصہ قرار دیتے ہوئے شہریوں کو محتاط رہنے کی ہدایت کی ہے۔
ایران اور امریکا کے درمیان بڑھتی ہوئی کشیدگی کے باعث خطے کی صورتحال مزید سنگین ہوگئی ہے۔ ایران کی جانب سے امریکی فوجی تنصیبات کو نشانہ بنانے کی کارروائیوں کے بعد امریکا نے بھی مشرق وسطیٰ میں اپنی فوجی موجودگی برقرار رکھنے اور بڑھانے کا فیصلہ کیا ہے۔
دوسری جانب امریکی وزیر دفاع پیٹ ہیگستھ نے مشرق وسطیٰ میں تعینات امریکی فوجیوں کی موجودگی کی مدت 2027 تک بڑھانے کی منظوری دے دی ہے۔
ذرائع کے مطابق خطے میں امریکی بحری، فضائی اور دیگر دفاعی یونٹس بدستور موجود رہیں گے، مشرق وسطیٰ میں اس وقت تقریباً 50 ہزار امریکی فوجی تعینات ہیں۔
یہ بھی پڑھیں:ایران نے امریکی ڈرون نمائش کیلئے چوک پر رکھ دیا
ایران اور امریکا کے درمیان جاری کشیدگی کے باعث مشرق وسطیٰ میں کسی بھی نئی کارروائی کے خدشات بڑھ گئے ہیں، جبکہ خطے کے ممالک بھی سیکیورٹی صورتحال پر گہری نظر رکھے ہوئے ہیں۔
