ایران نے امریکی ڈرون نمائش کیلئے چوک پر رکھ دیا

ایرانی میڈیا کی جانب سے جاری کی گئی ویڈیو میں دعویٰ کیا گیا ہے کہ تقریباً 3 کروڑ ڈالر مالیت کا امریکی MQ-9 ڈرون ایرانی فورسز نے مار گرایا، جسے اب مرکزی صوبے میں ایک عوامی مقام پر نمائش کیلئے رکھا گیا ہے۔ ویڈیو میں شہریوں کو مبینہ طور پر تباہ شدہ ڈرون کے ساتھ تصاویر بنواتے ہوئے دیکھا جا سکتا ہے۔

رپورٹ کے مطابق ڈرون کو عوام کے سامنے پیش کرنے کا مقصد امریکی فوجی کارروائی کے جواب میں اپنی دفاعی صلاحیت اور کارروائی کی کامیابی کو نمایاں کرنا ہے۔ تاہم امریکی حکام کی جانب سے اس مخصوص ڈرون کو ایران کی جانب سے مار گرائے جانے کے دعوے کی آزادانہ طور پر تصدیق سامنے نہیں آئی۔

یہ بھی پڑھیں:ایران نے امریکی اڈوں پر جوابی حملہ کر دیا

یاد رہے کہ گزشتہ روز امریکا نے ایران میں مختلف مقامات کو نشانہ بناتے ہوئے فضائی کارروائیاں کی تھیں۔ امریکی حکام کے مطابق حملوں میں مقررہ اہداف کو نشانہ بنایا گیا اور مشن مکمل کیا گیا۔

غیرملکی میڈیا رپورٹس کے مطابق امریکی حملوں میں قشم جزیرے، اہواز، بندر عباس، سیستان بلوچستان اور ہرمزگان کے علاقوں کو بھی نشانہ بنایا گیا۔