آبنائے ہرمز: بارودی سرنگوں سے ٹکرانے کے بعد جہاز میں آگ بھڑک اٹھی
ایرانی سرکاری ٹی وی کے مطابق متاثرہ ٹینکر ایرانی تھا اور آبی گزرگاہ سے مقررہ سکیورٹی ضوابط کی خلاف ورزی کرتے ہوئے گزرنے کی کوشش کر رہا تھا۔ تاہم حکام کی جانب سے تاحال جہاز اور اس پر سوار عملے کے حوالے سے مزید تفصیلات جاری نہیں کی گئیں۔
رپورٹ کے مطابق ٹینکر کے بارودی سرنگوں سے ٹکرانے کے بعد اس میں آگ بھڑک اٹھی اور جہاز مکمل طور پر رک گیا۔ واقعے کے بعد آبنائے ہرمز میں بحری جہازوں کی نقل و حرکت اور سکیورٹی صورتحال ایک بار پھر توجہ کا مرکز بن گئی ہے۔
ایرانی پاسدارانِ انقلاب نے خبردار کیا ہے کہ سکیورٹی قواعد کی خلاف ورزی کرنے والے دیگر بحری جہازوں کو بھی اسی طرح کے انجام کا سامنا کرنا پڑ سکتا ہے۔ پاسدارانِ انقلاب کے مطابق آبنائے ہرمز سے گزرنے والے تمام جہازوں کیلئے مقررہ ضوابط پر عمل کرنا ضروری ہے۔
دوسری جانب امریکی سینٹرل کمانڈ (سینٹکام) نے کہا ہے کہ امریکی افواج نے آبنائے ہرمز میں خطرہ بننے والی ایرانی پاسدارانِ انقلاب کی مائن لیئنگ فورسز کے خلاف محدود اور انتہائی درست کارروائی کی ہے۔
سینٹکام کے مطابق لارک جزیرے پر موجود ایرانی پاسدارانِ انقلاب کی بارودی سرنگیں بچھانے والی فورسز آبنائے ہرمز میں فوری خطرہ بن رہی تھیں، جس کے پیش نظر امریکی افواج نے کارروائی کی۔
یہ بھی پڑھیں:نیپال میں تباہ کن سیلاب نے قیامت ڈھا دی، ہلاکتیں 903 تک پہنچ گئیں
واضح رہے کہ آبنائے ہرمز دنیا کی اہم ترین تیل گزرگاہوں میں شمار ہوتی ہے، اس لیے یہاں کسی بھی بڑے سکیورٹی واقعے کے عالمی توانائی منڈی پر اثرات مرتب ہونے کا خدشہ رہتا ہے۔
