سونے کی کان بیٹھ گئی، 100 سے زائد افراد ہلاک
افسوسناک حادثہ کیمرون کی سرحد کے قریب واقع زیمبوئے گاؤں میں پیش آیا، جہاں سونے کی کان میں بڑی تعداد میں افراد کام کررہے تھے۔ اچانک کان کا ایک حصہ منہدم ہونے سے متعدد کان کن ملبے تلے دب گئے۔
حادثے کے فوراً بعد مقامی افراد اور امدادی ٹیموں نے جائے وقوعہ پر پہنچ کر ریسکیو آپریشن شروع کیا، ملبے تلے دبے افراد کو تلاش کرنے اور ممکنہ طور پر زندہ افراد کو نکالنے کی کوششیں جاری ہیں۔
مقامی انتظامیہ کے مطابق حادثے میں ہلاکتوں کی تعداد 100 سے تجاوز کرچکی ہے، تاہم امدادی کارروائیاں جاری رہنے کے باعث حتمی تعداد میں اضافہ ہوسکتا ہے۔ حکام کی جانب سے متاثرہ خاندانوں کو بھی صورتحال سے آگاہ کیا جارہا ہے۔
حادثے کی وجوہات جاننے کیلئے تحقیقات کا آغاز کردیا گیا ہے، متعلقہ ادارے اس بات کا تعین کررہے ہیں کہ کان بیٹھنے کی اصل وجہ کیا تھی اور اسے چلانے کیلئے حفاظتی اقدامات اور قانونی تقاضوں پر کس حد تک عمل کیا جارہا تھا۔
دوسری جانب پڑوسی ملک کیمرون کی جانب سے حادثے کے متاثرین کیلئے تعاون کی پیشکش کی گئی ہے۔ کیمرون حکام نے زخمیوں کو طبی امداد فراہم کرنے کی پیشکش کرتے ہوئے امدادی سرگرمیوں میں ممکنہ معاونت کا عندیہ دیا ہے۔
یہ بھی پڑھیں:سیاحوں کا ہیلی کاپٹر تباہ، 5 امریکیوں سمیت 7 افراد ہلاک
حکام کے مطابق ریسکیو آپریشن مکمل ہونے کے بعد حادثے کی وجوہات اور ذمہ داروں سے متعلق مزید تفصیلات سامنے آنے کی توقع ہے۔
