ہوٹل میں خوفناک آتشزدگی، 9 افراد جان کی بازی ہار گئے
بھارتی میڈیا کے مطابق آتشزدگی کا واقعہ کولکتہ کے ایک ہوٹل میں پیش آیا، جہاں آگ نے دیکھتے ہی دیکھتے دوسری منزل کو اپنی لپیٹ میں لے لیا۔ آگ لگنے کی اطلاع ملتے ہی فائر بریگیڈ اور امدادی ٹیمیں فوری طور پر موقع پر پہنچ گئیں اور ریسکیو آپریشن شروع کردیا۔
امدادی اہلکاروں نے شدید کوششوں کے بعد ہوٹل میں پھنسے افراد کو بحفاظت باہر نکالا، ریسکیو ٹیموں نے کارروائی کے دوران تقریباً 30 افراد کو ہوٹل سے بحفاظت نکال لیا، تاہم آتشزدگی کے باعث 9 افراد جان کی بازی ہار گئے۔
حادثے میں جانبحق ہونے والے تمام افراد بنگلا دیشی شہری تھے، زخمیوں کو فوری طبی امداد کیلئے قریبی اسپتال منتقل کردیا گیا، جہاں بعض زخمیوں کی حالت تشویشناک بتائی جارہی ہے۔
ابتدائی تحقیقات کے مطابق ہوٹل میں آگ لگنے کی ممکنہ وجہ شارٹ سرکٹ قرار دی جارہی ہے، تاہم حکام نے واضح کیا ہے کہ حتمی وجہ کا تعین مکمل تحقیقات کے بعد ہی کیا جاسکے گا۔
فائر بریگیڈ حکام نے آگ پر قابو پانے کے بعد ہوٹل کے مختلف حصوں کا جائزہ لیا اور مزید کسی شخص کے اندر پھنسے ہونے کے امکان کو ختم کرنے کیلئے سرچ آپریشن بھی کیا۔
یہ بھی پڑھیں:پیچھا کرنے والے لڑکوں سے بچتے ہوئے لڑکی بس تلے آکر جاں بحق
واقعے کے بعد متعلقہ اداروں نے تحقیقات کا آغاز کردیا ہے جبکہ ہوٹل کی حفاظتی انتظامات اور فائر سیفٹی سے متعلق پہلوؤں کا بھی جائزہ لیا جارہا ہے، غفلت یا حفاظتی اصولوں کی خلاف ورزی ثابت ہونے پر ذمہ داروں کیخلاف قانون کے مطابق کارروائی کی جائے گی۔
