پیچھا کرنے والے لڑکوں سے بچتے ہوئے لڑکی بس تلے آکر جاں بحق
پولیس کے مطابق لڑکی گاڑی میں سوار تھی کہ محلے کے دو لڑکوں نے مبینہ طور پر اس کا پیچھا شروع کردیا۔ دونوں لڑکوں پر الزام ہے کہ انہوں نے لڑکی کو زبردستی اپنے ساتھ لے جانے کی کوشش کی، جس پر لڑکی نے خود کو بچانے کیلئے فرار ہونے کی کوشش کی۔
پولیس کا کہنا ہے کہ اسی دوران لڑکی سڑک پر موجود بس کے نیچے آگئی اور شدید زخمی ہوگئی۔ حادثے کے نتیجے میں لڑکی موقع پر ہی دم توڑ گئی۔
واقعے کی اطلاع ملتے ہی پولیس موقع پر پہنچ گئی اور شواہد اکٹھے کرنے کا عمل شروع کردیا۔ پولیس کے مطابق دونوں مبینہ ملزمان واقعے کے بعد فرار ہوگئے، جن کی گرفتاری کیلئے کارروائی جاری ہے
پولیس حکام کا کہنا ہے کہ علاقے میں نصب سی سی ٹی وی کیمروں کی ریکارڈنگ حاصل کی جارہی ہے تاکہ واقعے کی مکمل صورتحال معلوم کی جاسکے اور فرار ہونے والے دونوں لڑکوں کا سراغ لگایا جاسکے۔
پولیس نے واقعے کے مختلف پہلوؤں سے تحقیقات شروع کردی ہیں، لڑکی کی ہلاکت کے محرکات اور ذمہ داروں کے تعین کیلئے شواہد جمع کیے جارہے ہیں۔
یہ بھی پڑھیں:موٹر وے ایم ٹو پر بڑا حادثہ، بس سمیت متنعد گاڑیاں آپس میں ٹکرا گئیں
واقعے کے بعد علاقے میں تشویش کی فضا پیدا ہوگئی، شہریوں نے مطالبہ کیا ہے کہ واقعے کی شفاف تحقیقات کرکے ذمہ دار افراد کو قانون کے مطابق کارروائی کا سامنا کرایا جائے۔
