سیاحوں کو لیجانے والا مسافر طیارہ گر کر تباہ،تمام مسافر ہلاک

 حادثے کے بعد ریسکیو اداروں نے فوری امدادی کارروائیاں شروع کر دیں جبکہ حکام نے واقعے کی تحقیقات کا آغاز کر دیا ہے۔

غیر ملکی میڈیا کے مطابق حادثے کا شکار ہونے والا طیارہ نازکا لائنز کے قریب سیاحتی پرواز پر تھا، پیرو کے سرکاری حکام نے بتایا کہ طیارے میں 11 غیر ملکی سیاح اور 2 عملے کے ارکان سوار تھے۔ ہلاک ہونے والے سیاحوں کا تعلق جرمنی، اٹلی اور اسپین سے بتایا گیا ہے۔

پیرو کی وزارت ٹرانسپورٹ کے مطابق طیارے کے عملے نے مقامی وقت کے مطابق دوپہر ایک بجے ہنگامی صورتحال کی اطلاع کنٹرول ٹاور کو دی، تاہم چند ہی لمحوں بعد طیارے کا رابطہ اچانک منقطع ہو گیا۔

اس کے بعد حکام نے فوری طور پر سرچ اینڈ ریسکیو آپریشن شروع کیا اور جائے حادثہ پر فائر بریگیڈ، ایمبولینسوں اور امدادی ٹیموں کو روانہ کیا گیا۔

حکام کے مطابق حادثے کی وجوہات جاننے کیلئے تحقیقات جاری ہیں اور ماہرین جائے وقوعہ سے شواہد اکٹھے کر رہے ہیں۔ ابتدائی طور پر حادثے کی حتمی وجہ سامنے نہیں آ سکی۔

واضح رہے کہ نازکا لائنز دنیا کے مشہور آثارِ قدیمہ میں شمار ہوتی ہیں، جہاں ہر سال ایک لاکھ سے زائد سیاح فضائی اور زمینی دورے کیلئے آتے ہیں۔

یہ بھی پڑھیں:ٹرمپ کا ایران پر ممکنہ حملہ مؤخر کرنے کا اعلان
یہ مقام اپنی پراسرار زمینی نقش نگاری اور تاریخی اہمیت کی وجہ سے عالمی سطح پر سیاحوں کی توجہ کا مرکز ہے، حکام نے متاثرہ خاندانوں سے اظہارِ افسوس کرتے ہوئے مکمل تحقیقات اور ضروری اقدامات کی یقین دہانی کرائی ہے۔