ٹرمپ کی نطنز کے ایرانی ایٹمی مرکز پر حملے کی دھمکی

ان کے تازہ بیان نے مشرقِ وسطیٰ میں پہلے سے موجود کشیدگی میں مزید اضافہ کر دیا ہے، جبکہ عالمی سطح پر اس کے ممکنہ اثرات پر بھی تشویش کا اظہار کیا جا رہا ہے۔

وائٹ ہاؤس میں میڈیا سے گفتگو کرتے ہوئے صدر ٹرمپ نے دعویٰ کیا کہ نطنز کے قریب واقع پہاڑی علاقہ کوہ کلنگ جلد امریکی کارروائی کی زد میں آ سکتا ہے، ایران اس ممکنہ حملے کو روکنے کی صلاحیت نہیں رکھتا اور اگر تہران بامعنی مذاکرات کیلئے تیار نہیں ہوتا تو امریکہ بھی کسی قسم کی بات چیت میں دلچسپی نہیں رکھتا۔

امریکی صدر نے مزید کہا کہ ایران دوبارہ مذاکرات کا خواہاں ہے اور واشنگٹن کے ساتھ ملاقاتیں اور کسی ممکنہ معاہدے کیلئے بھرپور دلچسپی ظاہر کر رہا ہے۔

تاہم انہوں نے واضح کیا کہ کسی بھی پیش رفت کا انحصار ایران کے عملی اقدامات اور مذاکرات کے حوالے سے سنجیدہ رویے پر ہوگا۔

یہ بھی پڑھیں:یورپ پہنچنے کا خواب 143 تارکینِ وطن کو سمندر نگل گیا

لبنان کی صورتحال پر اظہار خیال کرتے ہوئے ٹرمپ نے کہا کہ امریکہ لبنان کے ساتھ احترام اور تعاون پر مبنی تعلقات برقرار رکھنا چاہتا ہے، اگر لبنان کے صدر مناسب سمجھیں تو امریکہ حزب اللہ کے ساتھ بھی بات چیت کے امکانات پر غور کرنے کیلئے تیار ہے۔