ایران نے امریکی میزائل دفاعی نظام کو چکمہ دینے کی صلاحیت حاصل کر لی
رپورٹس کے مطابق ایران کے مبینہ نئے میزائل انتہائی تیز رفتاری سے اپنے ہدف کی جانب بڑھتے ہیں اور دورانِ پرواز اپنی سمت اور پوزیشن میں تبدیلی کی صلاحیت رکھتے ہیں، یہی خصوصیات انہیں روایتی میزائل دفاعی نظام کیلئے زیادہ مشکل ہدف بناتی ہیں۔
رپورٹ میں مزید دعویٰ کیا گیا ہے کہ امریکی محکمہ دفاع (پینٹاگون) اس بات پر تشویش کا اظہار کر رہا ہے کہ تہران حساس اہداف کو اتنی درستگی سے کس طرح نشانہ بنا رہا ہے، تاہم اس حوالے سے امریکی حکام کی جانب سے ایسی کسی تکنیکی تشخیص کی باضابطہ تصدیق جاری نہیں کی گئی۔
یہ رپورٹس ایک ایسے وقت میں سامنے آئی ہیں جب خطے میں ایران اور امریکہ کے درمیان کشیدگی برقرار ہے، اسی تناظر میں جمعہ کے روز اردن میں واقع ایک امریکی فوجی اڈے پر حملے کی اطلاعات بھی سامنے آئیں، جن میں دو امریکی فوجیوں کی ہلاکت اور متعدد اہلکاروں کے زخمی ہونے کی تصدیق کی گئی ہے۔
دفاعی امور کے ماہرین کا کہنا ہے کہ جدید میزائل ٹیکنالوجی اور دفاعی نظام سے متعلق دعوؤں کی درست جانچ کیلئے سرکاری اور آزاد ذرائع سے تصدیق ضروری ہوتی ہے۔
یہ بھی پڑھیں:امریکا کے ایران پر مسلسل حملے، 3 افراد شہید، 8 زخمی
خطے میں جاری کشیدگی کے باعث اس نوعیت کی اطلاعات عالمی سطح پر بھی غیر معمولی توجہ حاصل کر رہی ہیں، جبکہ مختلف ممالک صورتحال پر گہری نظر رکھے ہوئے ہیں۔
