ایران کا کویت اور اردن میں امریکی فوجی تنصیبات پر حملہ
ایرانی سرکاری میڈیا کے مطابق اسلامی انقلابی گارڈ کور (آئی آر جی سی) نے ایک بیان میں کہا ہے کہ اس نے اپنی عسکری کارروائی نصر " کے آٹھویں مرحلے کے دوران کویت میں واقع علی السالم ایئر بیس پر مشترکہ میزائل اور ڈرون حملہ کیا۔
بیان میں دعویٰ کیا گیا کہ حملے کے دوران امریکی فوج کے زیر استعمال سی-ریم ریڈار سسٹم اور امریکی اہلکاروں کے اجتماع کے ایک مقام کو نشانہ بنایا گیا، تاہم ایرانی دعوے کی آزاد ذرائع سے فوری طور پر تصدیق نہیں ہو سکی۔
آئی آر جی سی کی جانب سے الزام عائد کیا گیا ہے کہ امریکا نے ایران کیخلاف کارروائیوں کیلئے کویتی سرزمین استعمال کی، اور کویتی عوام سے مطالبہ کیا کہ وہ اپنے ملک سے امریکی افواج کے انخلا کا مطالبہ کریں۔
دوسری جانب ایرانی فوج نے بھی دعویٰ کیا ہے کہ اردن میں موجود امریکی فوجی تنصیبات کو خودکش ڈرونز کے ذریعے نشانہ بنایا گیا۔
ایرانی سرکاری ٹی وی کے مطابق ان حملوں میں امریکی فوج کے مواصلاتی نظام اور ایندھن ذخیرہ کرنے والی تنصیبات کو ہدف بنایا گیا۔
ایرانی فوج کا کہنا ہے کہ یہ کارروائیاں امریکا کی جانب سے ایران پر کیے گئے حالیہ فضائی حملوں کے جواب میں کی گئی ہیں۔
یہ بھی پڑھیں:تارکینِ وطن کی کشتی الٹ گئی، 50 افراد لقمہ اجل بن گئے
تاہم امریکا، کویت اور اردن کی جانب سے ان حملوں یا نقصانات کے حوالے سے فوری طور پر کوئی تصدیقی بیان سامنے نہیں آیا۔ خطے میں بڑھتی ہوئی کشیدگی کے باعث عالمی برادری نے صورتحال پر گہری تشویش کا اظہار کیا ہے۔
