کل بدھ کے روز سورج خانہ کعبہ کے عین اوپر ہو گا
ماہرین فلکیات کے مطابق یہ قدرتی مظہر سال میں صرف دو مرتبہ پیش آتا ہے اور دنیا بھر کے مسلمانوں کے لیے قبلے کی درست سمت معلوم کرنے کا آسان اور قدیم طریقہ بھی فراہم کرتا ہے۔
جدہ فلکیاتی سوسائٹی نے بتایا ہے کہ مکہ مکرمہ کے مقامی وقت کے مطابق دوپہر 12 بج کر 26 منٹ اور 44 سیکنڈ پر سورج 90 ڈگری کے زاویے پر خانہ کعبہ کے اوپر پہنچے گا۔
اس وقت سورج اور خانہ کعبہ ایک ہی عمودی خط میں ہوں گے جس کے باعث عمارت کا سایہ دکھائی نہیں دے گا یا انتہائی مختصر ہو جائے گا۔
پاکستانی وقت کے مطابق یہ فلکیاتی منظر دوپہر 2 بج کر 26 منٹ اور 44 سیکنڈ پر دیکھا جا سکے گا۔
ماہرین کے مطابق اس وقت دنیا کے مختلف حصوں میں موجود مسلمان کسی سیدھی چیز، عمارت، کھمبے یا لکڑی کے سائے کی مخالف سمت دیکھ کر قبلے کا درست رخ متعین کر سکتے ہیں۔
اس طریقے کے لیے قطب نما، موبائل ایپ یا کسی جدید آلے کی ضرورت نہیں ہوتی، قدیم زمانے میں بھی مسلمان اسی اصول کو استعمال کرتے ہوئے قبلے کی سمت معلوم کرتے تھے۔
یہ بھی پڑھیں: پاکستانیوں کیلئے سعودی عرب نے نیا پیکیج ویزا متعارف کرا دیا
زمین میں لکڑی یا چھڑی سیدھی گاڑ دی جاتی اور سورج کے خانہ کعبہ کے اوپر آنے کے وقت پیدا ہونے والے سائے کی مخالف سمت کو قبلے کا رخ سمجھا جاتا تھا۔
فلکیاتی ماہرین کا کہنا ہے کہ یہ واقعہ سائنسی اعتبار سے اہم ہے اور مسلمانوں کے لیے عملی و روحانی اہمیت بھی رکھتا ہے ۔
