گندم، آٹے، روٹی کی قیمتیں مستحکم رکھنے کیلئے پنجاب حکومت کا بڑا اقدام
ڈی جی فوڈ پنجاب امجد حفیظ نے بتایا کہ سرکاری گندم 3 ہزار 800 روپے فی من کے نرخ پر فلور ملوں کو جاری کر دی گئی، وقت گزرنے کے ساتھ ساتھ گندم کے نرخ میں بتدریج کمی لائی جائے گی ۔
ان کا کہنا تھا کہ آٹا اور گندم عام شہریوں اور غریب طبقات کی دسترس میں رکھے جائیں گے، پاسکو کی ایک ملین میٹرک ٹن گندم حکومتِ پنجاب کو منتقل کی جا رہی ہے۔
امجد حفیظ نے کہا کہ گندم کی منتقلی کا مقصد صوبے میں وافر دستیابی کو یقینی بنانا ہے، سرکاری ذخائر کا اجراء ایک مربوط حکمتِ عملی کے تحت جاری رہے گا۔
ڈی جی فوڈ پنجاب کا مزید کہنا تھا کہ مارکیٹ میں گندم اور آٹے کی قیمتوں کی مسلسل نگرانی کی جا رہی ہے، صوبہ میں آٹے اور گندم کی مصنوعی قلت پیدا کرنے والے عناصر کے خلاف سخت قانونی کارروائی عمل میں لائی جائے گی۔
یاد رہے کہ گزشتہ روز نانبائی ایسوسی ایشن نے تنور بند کرنے کی دھمکی دیتے ہوئے روٹی کی قیمت 25 روپے مقرر کرنے کا مطالبہ کیا تھا۔
یہ بھی پڑھیں: آٹے کی نئی سرکاری قیمتوں کا اعلان
صدر متحدہ نانبائی ایسوسی ایشن آفتاب اسلم گل نے کہا کہ موجودہ قیمت پر روٹی فروخت کرنا ممکن نہیں رہا، اس لیے ضلعی انتظامیہ فوری طور پر سادہ روٹی کی نئی قیمت 25 روپے مقرر کرے کیونکہ روٹی کی قیمت میں 9 روپے اضافہ ناگزیر ہو چکا ہے۔
آفتاب اسلم گل نے مطالبہ کیا کہ اگر گیس کی لوڈشیڈنگ ختم کر دی جائے، آٹے کی قیمت کم کی جائے اور مناسب وزن کے آٹے کے تھیلے دستیاب کیے جائیں تو روٹی سستی بھی فروخت کی جا سکتی ہے۔
