آٹے کی نئی سرکاری قیمتوں کا اعلان
تاہم فلور مارکیٹ سے وابستہ تاجروں نے ان قیمتوں پر تحفظات کا اظہار کرتے ہوئے انہیں زمینی حقائق کے برعکس قرار دیا ہے۔
اعلان کے مطابق ڈھائی نمبر آٹے کی ہول سیل قیمت 122 روپے فی کلو جبکہ ریٹیل قیمت 125 روپے فی کلو مقرر کی گئی ہے۔ اسی طرح فائن آٹے کی ہول سیل قیمت 132 روپے فی کلو اور ریٹیل قیمت 135 روپے فی کلو طے کی گئی ہے۔
سرکاری نوٹیفکیشن کے مطابق چکی کے آٹے کی قیمت 145 روپے فی کلو مقرر کی گئی ہے، جس کا اطلاق فوری طور پر ہوگا۔ انتظامیہ کا کہنا ہے کہ ان نرخوں کا مقصد شہریوں کو مناسب قیمت پر آٹا فراہم کرنا اور مارکیٹ میں قیمتوں کو مستحکم رکھنا ہے۔
دوسری جانب شہاب الدین مارکیٹ کے صدر محمد اسلم نے نئی قیمتوں پر شدید تحفظات کا اظہار کرتے ہوئے کہا کہ سرکاری نرخ موجودہ مارکیٹ لاگت سے مطابقت نہیں رکھتے، چکی کا آٹا انہیں 150 روپے فی کلو پڑتا ہے، جبکہ سرکاری قیمت 145 روپے مقرر کی گئی ہے، جس پر فروخت کرنا ممکن نہیں۔
انہوں نے مزید کہا کہ ریگولر آٹے کی لاگت 134 روپے فی کلو ہے، لیکن اس کی ریٹیل قیمت 125 روپے فی کلو مقرر کی گئی ہے، جس سے دکانداروں کو مالی نقصان کا سامنا کرنا پڑ سکتا ہے۔
یہ بھی پڑھیں:حکومت کا پٹرولیم مصنوعات کی قیمتوں میں اضافے کا اعلان
محمد اسلم کا کہنا تھا کہ قیمتوں کا تعین کرتے وقت مارکیٹ کی حقیقی لاگت، ٹرانسپورٹ اخراجات اور دیگر عوامل کو بھی مدنظر رکھا جانا چاہیے تاکہ تاجر اور صارف دونوں کے مفادات کا تحفظ یقینی بنایا جا سکے۔
دوسری جانب شہری نئی قیمتوں پر عمل درآمد اور آٹے کی دستیابی کی صورتحال پر گہری نظر رکھے ہوئے ہیں
