تاجر وں کا کل ملک کی سب سے بڑی ہول سیل مارکیٹ بند رکھنے کا اعلان
نجی ٹی وی کی رپورٹ کے مطابق کراچی کی ہول سیل گروسرز ایسوسی ایشن کے چیئرمین رؤف ابراہیم اعلان کیا ہے کہ کل 15 جولائی بدھ کے روز جوڑیا بازار، لی مارکیٹ، ڈانڈیا بازار، نانک واڑہ سمیت لانڈھی ملیر کورنگی اور لیاقت آباد کی ہول سیل اجناس کی دکانیں بند رہیں گی۔
انہوں نے کہا کہ سب سے بڑی ہول سیل مارکیٹ کی بندش کے باعث ملک بھر میں اجناس کی سپلائی بھی جوڑیا بازار سے معطل رہے گی۔
رؤف ابراہیم کا کہنا تھا کہ آٹے کی قیمتوں کو جواز بنا کر دکانداروں کے خلاف کارروائیاں کی جا رہی ہیں، تاجر برادری کی گرفتاریاں، چالان، سیل اور ہراساں کرنے کا عمل کسی صورت قابل قبول نہیں۔
یہ بھی پڑھیں: سونے کی قیمتوں میں مزید کمی، آج پھر ہزاروں روپے سستا ہو گیا
انہوں نے الزام عائد کیا کہ چالان کے نام پر صرف ایزی پیسے کا نمبر دیا جا رہا ہے، کسی بھی دکاندار کو چالان کا کاغذ نہیں دیا گیا، دکانداروں کو 50 ہزار سے ڈیڑھ لاکھ روپے تک کے چالان کے نمبرز دیے گئے ہیں۔
صدر گروسری ایسوسی ایشن نے مزید کہا کہ فلور ملز مالکان پر کوئی چالان یا کوئی کارروائی کیوں نہیں کی جا رہی، مہنگا آٹا فلور ملز سے آ رہا ہے اس کے خلاف چالان اور سیل کریں، ہول سیل بازار کی بھی متعدد دکانیں تاحال سیل ہیں۔
