اسرائیلی صدر کو لیجانے والا ہیلی کاپٹر حادثے کا شکار
اسرائیلی میڈیا رپورٹس کے مطابق اسرائیلی فضائیہ کا ایک ہیلی کاپٹر نے صدر اسحاق ہرزوگ کو لے کر اڑان بھری ہی تھی کہ کچھ ہی دیر بعد حادثہ پیش آ گیا ۔
رپورٹ کے مطابق اسرائیلی صدر اسحاق ہرزوگ یروشلم میں ماؤنٹ ہرزل پر ایک یادگاری تقریب میں شریک ہوئے جس کے بعد وہ شمالی اسرائیل میں تعزیت (شیوا) کے لیے روانہ ہوئے تھے۔
میڈیا رپورٹس کے مطابق ہیلی کاپٹر نے جیسے ہی اڑان بھری سامنے سے آتے پرندوں کا ایک غول آیا جو ہیلی کاپٹر سے ٹکرا گیا جس کے بعد ہیلی کاپٹر ہچکولے کھانے لگا تاہم پائلٹ نے فوری طور پر ہنگامی لینڈنگ کی۔
اسرائیلی فوج کے ترجمان نے بتایا کہ مذکورہ واقعہ میں اسرائیلی صدر اسحاق ہرزوگ، فضائی عملے یا ہیلی کاپٹر میں سوار تمام افراد محفوظ رہے۔
ابتدائی معائنے میں ہیلی کاپٹر کو بھی کوئی بڑا نقصان نہیں پہنچا اور نہ ہی کسی کے زخمی ہونے کی اطلاع ملی ہے۔
یہ بھی پڑھیں: اسرائیل کا لبنان پر حملہ، امریکی صدر کا سخت ردعمل
ترجمان اسرائیلی فوج کے مطابق لینڈنگ کے بعد صدر اسحاق ہرزوگ اور فضائی عملے کو دوسرے ہیلی کاپٹر کے ذریعے ان کی منزل کی جانب روانہ کر دیا گیا۔
حکام کے مطابق متاثرہ ہیلی کاپٹر کو تکنیکی معائنے اور ضروری دیکھ بھال کے لیے اسرائیلی فضائیہ کے انجینئرنگ عملے کے حوالے کر دیا گیا ہے۔
ابتدائی طور پر حادثے کو برڈ اسٹرائیک قرار دیا گیا لیکن ترجمان اسرائیلی فوج نے واقعے کی مکمل وجوہات کے تعین کے لیے باقاعدہ تحقیقات کرانے کا اعلان کیا ہے۔
