امارات میں محرم الحرام کا چاند نظر آگیا، نئے اسلامی سال کا آغاز
متحدہ عرب امارات کے فلکیاتی مرکز کی جانب سے بھی اسلامی قمری سال 1448 ہجری کے پہلے مہینے محرم الحرام کا چاند دیکھے جانے کی تصدیق کر دی، چاند کی تصویر ابو ظہبی میں واقع ختم فلکیاتی رصدگاہ نے صبح 11 بجے حاصل کی۔
رصدگاہ کی جانب سے جاری کی گئی تصویر کے مطابق اس وقت چاند سورج سے 5.4 درجے کے فاصلے پر تھا جبکہ اس کی عمر 5 گھنٹے اور 35 منٹ تھی۔
اماراتی حکومت کی جانب سے اسلامی سال کے آغاز پر یکم محرم الحرام کو عام تعطیل کا اعلان کیا، اس طرح ہفتہ اور اتوار کی ہفتہ وار تعطیل منانے والے شہریوں اور رہائشیوں کو ایک بار پھر طویل تعطیلات سے لطف اندوز ہونے کا موقع ملا، یکم محرم کی چھٹی ملا کر یہ تین روزہ تعطیلات بن گئیں۔
دوسری جانب شارجہ میں سرکاری ملازمین اور طلبہ نے چار روزہ تعطیلات کا لطف اٹھایا، کیونکہ وہاں معمول کے مطابق جمعہ، ہفتہ اور اتوار ہفتہ وار چھٹی کے ایام ہیں۔
یہ بھی پڑھیں: نئے اسلامی سال کے آغاز پر کتنی چھٹیاں ہوں گی؟
خیال رہے کہ اسلامی یا ہجری کیلنڈر کا انحصار قمری مہینوں پر ہوتا ہے اور نئے سال کا آغاز یکم محرم سے ہوتا ہے، جس کا تعین چاند کی رویت سے کیا جاتا ہے، ہجری کیلنڈر کا ہر مہینہ 29 یا 30 دنوں پر مشتمل ہوتا ہے۔
نئے ہجری سال کی سرکاری تعطیل کے موقع پر پیر 15 جون کو دبئی میں تمام عوامی پوائنٹس پر شہریوں کے لیے پارکنگ مفت کر دی گئی، معمول کے پارکنگ نرخوں کا نفاذ منگل 16 جون سے دوبارہ ہو گا۔
