اسرائیلی حملوں میئر سمیت 4 افراد شہید
تازہ حملوں کے بعد متاثرہ علاقوں میں خوف و ہراس پھیل گیا ہے جبکہ کشیدگی میں مزید اضافے کا خدشہ ظاہر کیا جا رہا ہے۔
لبنانی سرکاری خبر ایجنسی کے مطابق اسرائیلی فوج نے ضلع جیزین میں واقع الریحان اور کفرہنہ میونسپلٹیز کو ڈرون حملوں کا نشانہ بنایا۔ ان حملوں کے نتیجے میں الریحان میونسپلٹی کے میئر سمیت چار افراد جان کی بازی ہار گئے۔ حملوں کے بعد امدادی ٹیموں نے متاثرہ علاقوں میں کارروائیاں شروع کر دیں۔
رپورٹس کے مطابق اسرائیلی فوج نے ضلع مرجعیون کے قصبے خیام پر بھی فضائی حملے کیے، جبکہ ضلع نباطیہ کے علاقے قصیبہ میں ڈرون حملوں کی اطلاعات موصول ہوئی ہیں۔
اس کے علاوہ ضلع صور کے علاقے مجدل زون میں اسرائیلی توپ خانے کی گولہ باری بھی کی گئی، جس سے مقامی آبادی میں شدید تشویش پائی جا رہی ہے۔
یہ حملے ایسے وقت میں ہوئے ہیں جب اسرائیلی فوج نے حال ہی میں جنوبی لبنان کے 20 قصبوں اور دیہات کے رہائشیوں کو اپنے گھر فوری طور پر خالی کرنے کی ہدایت جاری کی تھی۔ ان احکامات کے بعد متعدد خاندان محفوظ مقامات کی جانب نقل مکانی پر مجبور ہو چکے ہیں۔
یہ بھی پڑھیں:بھارتی فضائیہ کا طیارہ حادثے کا شکار، پائلٹ سمیت 5 افراد ہلاک
دوسری جانب لبنان اور اسرائیل کے درمیان مذاکرات کے اگلے مرحلے کی تیاریاں بھی جاری ہیں، جو 22 جون کو واشنگٹن میں متوقع ہیں۔
