بھارتی فضائیہ کا طیارہ حادثے کا شکار، پائلٹ سمیت 5 افراد ہلاک
حادثے کے نتیجے میں پائلٹ سمیت 5 افراد ہلاک جبکہ ایک شریک پائلٹ زخمی ہو گیا، واقعے کے بعد امدادی اور ریسکیو ٹیمیں فوری طور پر جائے حادثہ پر پہنچ گئیں اور امدادی سرگرمیاں شروع کر دیں۔
بھارتی میڈیا رپورٹس کے مطابق فضائیہ کا اے این-32 طیارہ لینڈنگ کے مرحلے میں تھا کہ اچانک حادثے کا شکار ہو گیا۔ ابتدائی اطلاعات کے مطابق طیارے میں لینڈنگ کے بعد آگ بھڑک اٹھی، جس کے باعث جانی نقصان ہوا۔
بھارتی فضائیہ نے بھی واقعے کی تصدیق کرتے ہوئے حادثے کی وجوہات جاننے کیلئے تحقیقات شروع کرنے کا اعلان کیا ہے۔
رپورٹس کے مطابق رواں سال بھارتی فضائیہ کو متعدد فضائی حادثات کا سامنا کرنا پڑا ہے۔ مختلف میڈیا ذرائع کے مطابق سال 2026 کے دوران اب تک کئی فوجی طیارے اور ایک ہیلی کاپٹر حادثات کا شکار ہو چکے ہیں، جس پر دفاعی حلقوں میں تشویش پائی جاتی ہے۔
دفاعی ماہرین کا کہنا ہے کہ مسلسل پیش آنے والے فضائی حادثات سے فضائی بیڑے کی دیکھ بھال، تکنیکی مسائل اور آپریشنل نظام کے حوالے سے سوالات جنم لے رہے ہیں، حادثات کی بڑھتی تعداد فضائی سلامتی کے معیار کو بہتر بنانے کی ضرورت کو اجاگر کرتی ہے۔
یہ بھی پڑھیں:امریکی حملے کا نشانہ بننے والا جہاز بھارتی نکلا
حادثے کے بعد حکام نے علاقے کو گھیرے میں لے لیا ہے جبکہ تکنیکی ماہرین ملبے کا جائزہ لے رہے ہیں۔ بھارتی فضائیہ کا کہنا ہے کہ تحقیقات مکمل ہونے کے بعد حادثے کی اصل وجوہات اور ذمہ دار عوامل کے بارے میں تفصیلی رپورٹ جاری کی جائے گی۔
