امریکی حملے کا نشانہ بننے والا جہاز بھارتی نکلا
امریکی فوج نے چند روز قبل بحیرۂ عمان میں ایک ایسے جہاز کو نشانہ بنانے کی تصدیق کی تھی جس پر الزام تھا کہ وہ امریکی ناکہ بندی اور احکامات کی خلاف ورزی کرتے ہوئے ایرانی بندرگاہ کی جانب بڑھ رہا تھا۔ بعد ازاں سامنے آنے والی معلومات کے مطابق یہ جہاز بھارتی ملکیت کا کیمیکل ٹینکر ایم ٹی حسنہ تھا۔
امریکی سینٹرل کمانڈ (سینٹ کام) کے مطابق ٹینکر کو متعدد بار وارننگز جاری کی گئیں، تاہم عملے نے جہاز کا رخ تبدیل کرنے سے انکار کر دیا۔
بیان میں کہا گیا کہ امریکی بحری بیڑے سے وابستہ یو ایس ایس ابراہم لنکن سے ایف اے-18 سپر ہارنیٹ جنگی طیارہ روانہ کیا گیا، جس نے کارروائی کرتے ہوئے ٹینکر کو نشانہ بنایا اور اسے ناکارہ بنا دیا۔
امریکی حکام کے مطابق کارروائی کے بعد ٹینکر نے اپنا راستہ تبدیل کر لیا اور ایران کی جانب پیش قدمی روک دی۔ واقعے کے دوران جہاز پر موجود 21 افراد کو بحفاظت بچا لیا گیا، جبکہ 3 افراد کے لاپتا ہونے کی اطلاعات ہیں۔
یہ بھی پڑھیں:ایران نے نے ایک بار پھر آبنائے ہرمز کو بند کر دیا
رپورٹس کے مطابق ٹینکر پر 28 افراد کا عملہ سوار تھا جن میں 24 بھارتی شہری شامل تھے۔ بھارتی میڈیا اور بعض علاقائی ذرائع کا کہنا ہے کہ نئی دہلی نے اس واقعے پر شدید تشویش کا اظہار کرتے ہوئے امریکی مشن کے نائب سربراہ کو طلب کیا اور باضابطہ احتجاج ریکارڈ کرایا ہے۔
