شوٹر کا ایران جنگ سے کوئی تعلق نہیں، ڈونلڈ ٹرمپ

اس واقعے میں صدر ٹرمپ سمیت تمام اہم شخصیات محفوظ رہیں جبکہ حملہ آور کو فوری طور پر گرفتار کر لیا گیا۔

پریس کانفرنس سے خطاب کرتے ہوئے صدر ٹرمپ نے بتایا کہ مشتبہ شخص نے تقریباً 15 گز کے فاصلے سے حملے کی کوشش کی، تاہم سیکریٹ سروس کے اہلکاروں نے بروقت اور بہادری سے کارروائی کرتے ہوئے صورتحال کو قابو میں کر لیا، حملہ آور سکیورٹی چیک پوائنٹ پر ہی روک لیا گیا، جس کے باعث بڑا نقصان ٹل گیا۔

صدر ٹرمپ نے کہا کہ واقعے کے دوران ایک سکیورٹی اہلکار کو گولی لگی، مگر بلٹ پروف جیکٹ کی وجہ سے وہ محفوظ رہا، وہ خود اس اہلکار سے بات کر چکے ہیں اور اس کی بہادری کو سراہتے ہیں۔

امریکی صدر نے مزید کہا کہ حملہ آور کے پاس متعدد ہتھیار موجود تھے اور اس کا تعلق ریاست کیلیفورنیا سے بتایا جا رہا ہے۔

انہوں نے واقعے کو انتہائی حیران کن لمحہ قرار دیتے ہوئے کہا کہ اچانک زور دار آوازیں سنائی دیں، جس پر ماحول میں خوف پھیل گیا، اس دوران خاتون اول میلانیا ٹرمپ نے بھی فوراً خطرے کی نشاندہی کی۔

یہ بھی پڑھیں:وائٹ ہاؤس کوریسپونڈینٹ ڈنر میں ڈونلڈ ٹرمپ پر قاتلانہ حملہ

صدر ٹرمپ نے کہا کہ حالیہ برسوں میں یہ پہلا موقع نہیں کہ ریپبلکن رہنماؤں کو نشانہ بنایا گیا ہو، انہوں نے اس عزم کا اظہار کیا کہ ایسی کارروائیاں تقریبات کو روک نہیں سکتیں، آئندہ 30 دنوں میں اس سے بھی بڑی تقریب منعقد کی جائے گی۔