امریکی صدر ڈونلڈ ٹرمپ نے نیویارک پوسٹ کو انٹرویو دیتے ہوئے کہا کہ ایران کے ساتھ مذاکرات کا اگلا دور پھر پاکستان میں ہو سکتا ہے، ایران سے بات چیت کے لئے پاکستان جانے کا امکان زیادہ ہے، مذاکرات کا دوسرا دور آئندہ دو روز میں پاکستان میں ہو سکتا ہے۔
میڈیا نے سوال کیا کہ پاکستان کیوں جا رہے ہیں تو صدر ٹرمپ نے کہا کہ فیلڈ مارشل عاصم منیر بہت اچھا کام کر رہے ہیں ، ان کی کوششیں خطے میں کشیدگی کم کرنے میں مددگار ثابت ہو سکتی ہیں،ہم ایسے ملک کیوں جائیں جس کا اس معاملے سے کوئی تعلق نہیں ہے ، فیلڈ مارشل عاصم منیر لاجواب ہیں ،اس لیے ہم پاکستان جا رہے ہیں۔
ایک سوال کے جواب میں ڈونلڈ ٹرمپ نے کہا کہ امریکی میڈیا کو پاکستان میں موجود وہاں ہونا چاہیے کیونکہ اگلے دو دن میں کچھ بھی ہو سکتا ہے۔
یہ بھی پڑھیں: مذاکرات کے دوسرے مرحلے کا فیصلہ تہران کے ہاتھ میں ہے، جے ڈی وینس
یاد رہے کہ اس سے قبل ایرانی حکام نے کہا تھا کہ امریکا سے مذاکرات کا دوسرا دو ر ہماری ترجیح ہے، ہم مذاکرات کے لیے تیار ہیں دوسری طرف کا معلوم نہیں، اگر مذاکرات کا دوسرا دور ہوا تو پاکستان ہماری ترجیح ہو گی۔
واضح رہے کہ پاکستان نے ایران امریکا مذاکرات کے دوسرے مرحلے کی میزبانی کی پیشکش کر دی ہے۔
غیر ملکی خبر ایجنسی کے مطابق پاکستان نے سیز فائر کی مدت ختم ہونے سے پہلے مذاکرات اسلام آباد میں منعقد کرنے کی تجویز پیش کی ہے، فریق معاہدے کے لیے نئے بالمشافہ مذاکرات پر غور کر رہے ہیں۔
