امریکی نائب صدر جے ڈی وینس کا امریکی میڈیا سے گفتگو میں ایران کے ساتھ جاری مذاکرات پر کہنا تھا کہ ایران کے ساتھ مذاکرات میں خاطر خواہ پیشرفت ہوئی ہے، اب گیند ایران کے کورٹ میں ہے اور مذاکرات کے دوسرے مرحلے کا فیصلہ تہران کو کرنا ہے۔
جے ڈی وینس نے واضح کیا کہ ایران کو جوہری ہتھیار حاصل کرنے کی کوشش نہیں کرنی چاہیے، اور امریکہ اس حوالے سے اپنی ریڈ لائن پہلے ہی واضح کر چکا ہے، ایران سے افزودہ مواد نکالنا ضروری ہے، امریکہ نے ایران سے مطالبہ کیا ہے کہ وہ اپنے ملک سے جوہری مواد ہٹائے۔
یہ بھی پڑھیں:امریکی فوج نے آبنائے ہرمز کی ناکہ بندی شروع کر دی
انہوں نے مزید کہا کہ امریکہ کو توقع ہے کہ ایران آبنائے ہرمز کو کھولنے کی جانب پیشرفت کرے گا تاکہ عالمی تجارت بحال ہو سکے۔ امریکی صدر نے ایران پر سنگین الزام عائد کرتے ہوئے کہا کہ وہ دنیا کے خلاف اقتصادی دہشتگردی میں ملوث ہے۔
ادھر وطن واپسی پر امریکی نائب صدر جے ڈی وینس نے فوکس نیوزسے خصوصی گفتگو میں وزیراعظم شہباز شریف اورفیلڈ مارشل عاصم منیر کو بھرپور خراج تحسین پیش کرتے ہوئے کہا کہ وزیراعظم اور فیلڈ مارشل نے حقیقی سٹیٹس مین شپ کا مظاہرہ کیا۔
جے ڈی وینس نے وزیراعظم شہبازشریف اور فیلڈ مارشل عاصم منیر کو بے مثال میزبان قرار دیتے ہوئے کہا کہ وزیراعظم اور فیلڈ مارشل نے امریکہ ایران ثالثی میں بہترین کردار ادا کیا، امریکہ ایران نے طویل عرصے تک ایسے سنجیدہ مذاکرات نہیں کیے تھے۔
