ایران امریکا مذاکرات پر گفتگو کرتے ہوئے امریکی صدر ڈونلڈ ٹرمپ کا کہنا تھا کہ نائب صدر جے ڈی وینس، خصوصی ایلچی سٹیو وٹکوف اور جیرڈ کشنر نے مذاکرات کے حوالے سے مکمل طور پر آگاہ کیا ہے۔
انہوں نے کہا کہ مذاکرات فیلڈ مارشل عاصم منیر اور پاکستان کے وزیر اعظم شہباز شریف کی مہربان اور قابل قیادت کے ذریعے ہوئے، وزیر اعظم شہباز شریف اور فیلڈ مارشل سید عاصم منیر بہت ہی غیر معمولی آدمی ہیں۔
ان کا کہنا تھا کہ پاکستانی قیادت بھارت کے ساتھ ایک خوفناک جنگ میں 30 سے 50 ملین جانیں بچانے کے لیے مسلسل میرا شکریہ ادا کرتی ہے ۔
امریکی صدر نے کہا کہ ایران کے ساتھ ملاقات صبح سویرے شروع ہوئی اور رات بھر جاری رہی، ایران سے جوہری معاملے پر اتفاق نہیں ہو سکا، بیشتر نکات پر اتفاق ہو گیا ہے، ایران اپنے جوہری عزائم سے دستبردار ہونے کیلئے تیار نہیں ، جو نکات طے ہوئے وہ جنگ سے کئی درجے بہتر ہیں، ایران کی جوہری طاقت کا خاتمہ کیے بغیر ان نکات کی کوئی حیثیت نہیں۔
یہ بھی پڑھیں: صدر ٹرمپ کی آبنائے ہرمز کی بحری ناکہ بندی کی تجویز
ڈونلڈ ٹرمپ کا کہنا تھا کہ ایران نے آبنائے ہرمز کھولنے کا وعدہ پورا نہیں کیا، ایران کی پوری بحریہ، زیادہ تر بارودی سرنگیں بچھانے والے جہازتباہ کر دیے ہیں، امریکی نیوی فوری طور پر آبنائے ہرمز کی ناکہ بندی کرے گی ، امریکی نیوی کو کہاہےایران کو ٹول دینے والے جہازوں کو تلاش کریں۔
امریکی صدر نے کہا کہ جو بھی ایران کو ٹول ادا کرے گا اسے محفوظ سمندری راستہ نہیں ملے گا، ایران کو پیسہ چاہئیں اور وہ جوہری طاقت چاہتے ہیں، مناسب وقت پر امریکی فوج ایران میں جو باقی بچا ہے اسے بھی ختم کرے گی، ایران کو فوری آبی گزرگاہ کھولنے کا عمل شروع کرنا چاہیے، وہ اپنے اقدام سے ہرطرح کے قوانین کی خلاف ورزی کر رہے ہیں۔
