سوشل میڈیا پر امریکی نائب صدر جے ڈی وینس کے بیان کو ایٹمی حملوں سے جوڑنے پر وائٹ ہاؤس کی جانب سے جاری ردعمل میں کہا گیا کہ ایسا بالکل بھی نہیں ہے، ایسی کوئی بات نہیں کی گئی جس سے ایسا نتیجہ نکلتا ہو۔

ترجمان وائٹ ہاؤس نے کہا کہ ایرانی رجیم کے پاس مقامی وقت کے مطابق رات 8 بجے تک کا موقع ہے کہ مذاکرات مکمل کرتے ہوئے معاہدہ کریں،صرف صدر ٹرمپ ہی جانتے ہیں کہ چیزیں کہاں پر موجود ہیں اور وہ کیا کریں گے۔

واضح رہے کہ امریکی نائب صدر جے ڈی وینس نے کہا تھا کہ ہمارے پاس اپنی ٹول کٹ میں ایسے اوزار موجود ہیں جنہیں ہم نے ابھی تک استعمال کرنے کا فیصلہ نہیں کیا۔

جے ڈی وینس کا کہنا تھا کہ چاہتے ہیں ایران کبھی ایٹمی ہتھیار نہ بنا سکے، فیصلہ ایران کو کرنا ہے کہ نارمل ملک بنے یا دہشت گردوں کا ملک، جنگ سے پہلے ایران کو مذاکرات کی بہت جلدی تھی، اب ایران کی جانب سے مذاکرات میں تاخیری حربے آزمائے جا رہے ہیں۔

یہ بھی پڑھیں: آج رات ایران کی پوری تہذیب کو ختم کر دیا جائے گا، امریکی صدر

تاہم اب وائٹ ہاؤس نے امریکی نائب صدر کے بیان کو جوہری حملے سے جوڑنے کی کوشش کو مسترد کر دیا ہے۔

دوسری جانب امریکی صدر ڈونلڈ ٹرمپ کی ایران کو دی گئی ڈیڈلائن میں آٹھ گھنٹے باقی رہ گئے۔

امریکی اخبار کی جانب سے دعویٰ کیا گیا ہے کہ ایران نے امریکا سے رابطے ختم کر دیے ہیں، مشرق وسطیٰ میں جاری جنگ کی شدت بڑھنے کا خدشہ ہے۔

امریکی اخبار نے دعویٰ کیا ہے کہ ایرانی حکام کے مطابق تہران نے امریکا سےمذاکرات روک دیے ہیں، جنگ بندی بات چیت سے بھی انکارکر دیا، ایرانی حکام نےکہا کہ پاکستان کو اپنے فیصلے سےآگاہ کر دیا ہے۔