روسی وزارتِ دفاع کے مطابق فوج کا ٹرانسپورٹ طیارہ اے این 26 کریمیا کے علاقے میں گر کر تباہ ہوا، جس میں سوار تمام افراد لقمہ اجل بن گئے۔

حکام کے مطابق حادثے کا شکار ہونے والے طیارے میں 23 مسافر اور عملے کے 6 ارکان شامل تھے، ابتدائی اطلاعات کے مطابق طیارہ معمول کے مطابق پرواز کر رہا تھا کہ اچانک اڑان بھرنے کے کچھ ہی دیر بعد پائلٹ کا ائیر ٹریفک کنٹرول سے رابطہ منقطع ہو گیا، جس کے بعد طیارہ حادثے کا شکار ہو گیا۔

ریسکیو ٹیموں نے فوری کارروائی کرتے ہوئے جائے حادثہ تک رسائی حاصل کی اور طیارے کے ملبے کو تلاش کر لیا، امدادی ٹیمیں جائے وقوعہ پر موجود رہیں اور صورتحال کا جائزہ لیتی رہیں۔

ابتدائی تحقیقات میں خدشہ ظاہر کیا جا رہا ہے کہ حادثہ ممکنہ طور پر فنی خرابی کے باعث پیش آیا، تاہم حتمی وجوہات جاننے کیلئے باقاعدہ تحقیقات کا آغاز کر دیا گیا ہے۔ روسی حکام کا کہنا ہے کہ حادثے کی مکمل چھان بین کی جائے گی تاکہ مستقبل میں ایسے سانحات سے بچا جا سکے۔

یہ بھی پڑھیں:تہران نے معاہدہ نہ کیا تو امریکا مزید سخت فیصلے کرے گا: امریکی وزیر جنگ

یہ حادثہ روسی فضائی سلامتی کے حوالے سے کئی سوالات کو جنم دے رہا ہے، عوام کی جانب سے بھی اس واقعے پر گہرے دکھ اور افسوس کا اظہار کیا جا رہا ہے۔