واشنگٹن میں ایران امریکا جنگ پر پریس بریفنگ کے دوران امریکی وزیر جنگ پیٹ ہیگستھ کا کہنا تھا کہ امریکا بھرپور طاقت کے ساتھ ایران میں حملے کر رہا ہے، امریکا نے ایرانی فوج کو شدید نقصان پہنچایا ہے اور وہ مایوسی کا شکار ہے، پیر کے روز ایران میں 200 مقامات کو نشانہ بنایا گیا۔
امریکی وزیر جنگ نے کہا کہ امریکی صدر ڈونلڈ ٹرمپ ایران کے ساتھ ڈیل چاہتے ہیں، اگر تہران معاہدہ نہیں کرتا تو امریکا مزید سخت فیصلے کرے گا، ایران کو سمجھداری کا مظاہرہ کرتے ہوئے معاہدہ کر لے، ایران کی نئی قیادت کو پہلے سے زیادہ سمجھ داری کا مظاہرہ کرنا چاہیے۔
یہ بھی پڑھیں: جلد ہی ایران سے نکل جائیں گے، امریکی نائب صدر
ان کا کہنا تھا کہ آنے والے دن جنگ کے حوالے سے فیصلہ کُن ہوں گے اور ایران اب زیادہ کچھ کرنے کی پوزیشن میں نہیں رہا، امریکا کے پاس مزید آپشنز بھی موجود ہیں جبکہ ایران کے پاس اب آپشنز محدود رہ گئے ہیں۔
پیٹ ہیگستھ نے کہا کہ انہوں نے ہفتے کے روز مشرقِ وسطیٰ کا دورہ اور ایران کے خلاف جاری فوجی کارروائیوں میں مصروف امریکی افواج سے ملاقات کی تھی، اس دورے کا مقصد زمینی صورت حال کا خود جائزہ لینا تھا تاہم سکیورٹی خدشات کے پیشِ نظر اس دورے کی تفصیلات اور مقامات کو خفیہ رکھا گیا۔
