وائٹ ہاؤس میں میڈیا سے گفتگو کرتے ہوئے امریکی صدر ڈونلڈ ٹرمپ کا کہنا تھا کہ ہم نے ایران کی قیادت ختم کر دی،یہ رجیم چینج ہے، اب امریکا صحیح لوگوں سےبات کر رہا ہے جو معاہدہ کرنا چاہتے ہیں، ایران اس بارسمجھداری سے مذاکرات کر رہا ہے، نئی قیادت معاہدہ کرنے جا رہی ہے، ایران ڈیل کرنا چاہتا ہے۔
انہوں نے کہا کہ ہم ایران سے بات کر رہے ہیں، ایران میں شاندار کامیابیاں حاصل کر رہے ہیں، ایران کی نیوی، ائیر فورس تباہ کر دی ہے، ایران کا مواصلاتی نظام تباہ ہو چکا ہے، انہوں نے ہمیں ایک تحفہ بھیجا جو کل مل گیا، ایران نے ہمیں تیل اور گیس سے متعلق بہت بڑا تحفہ دیا ہے۔
ڈونلڈ ٹرمپ کا کہنا تھا کہ ایران میں اب نئی قیادت ہے دیکھتے ہیں کہ وہ کیسا کام کرتے ہیں، سعودی عرب، یو اے ای اور قطر ایران کے معاملے میں بہت بہترین رہے۔
یاد رہے کہ گزشتہ روز امریکی صدر ڈونلڈ ٹرمپ نے کہا تھا کہ ایران کے قابل احترام اعلیٰ رہنما سے بات چیت ہوئی، امید ہے ایران کے مسئلے کو حل کیا جا سکتا ہے،نہیں جانتا ایران کے سپریم لیڈر زندہ ہیں یا نہیں، میں نہیں چاہتا سپریم لیڈر مجتبیٰ خامنہ ای کو نشانہ بنایا جائے۔
یہ بھی پڑھیں: ٹرمپ کا ایرانی پاور پلانٹس اور توانائی تنصیبات پر حملے روکنے کا حکم
انہوں نے کہا کہ ایران افزودہ یورینیم میرے حوالے کر دے،کبھی دوبارہ اسے حاصل نہ کرے، ایٹمی ہتھیار نہیں چاہتے،صرف مشرق وسطیٰ میں امن چاہتے ہیں، اگر ایران کے پاس جوہری ہتھیار ہوتے تو وہ مشرق وسطیٰ پرقبضہ کر لیتا۔
امریکی صدر کا کہنا تھا کہ پاور پلانٹس پر حملے ملتوی کیے جس کا دارومدار مذاکرات کی کامیابی پر ہے، تفصیلی اورتعمیری بات چیت پورے ہفتے جاری رہے گی، معاہدے کی ضمانت نہیں دے سکتا لیکن ہم اس پر کام کر رہے ہیں۔
ڈونلڈ ٹرمپ نے کہا کہ اگر معاہدہ ہوا تو یہ خطے اور ایران کیلئے بہت شاندار ہو گا، اسرائیل سے بات ہوگئی ہے،وہ اس پیشرفت سے خوش ہے۔
