سماجی رابطوں کی ویب سائٹ ٹروتھ سوشل پر جاری ایک پیغام میں امریکی صدر ڈونلڈ ٹرمپ کا کہنا تھا کہ ایران کے ساتھ جنگ کے مکمل خاتمے کے لئے بات چیت ہوئی ہے، بات چیت کا مقصد مشرق وسطیٰ میں کشیدگی کا مکمل خاتمہ ہے۔
امریکی صدر نے کہا کہ میں ایران کے پاور پلانٹس اور توانائی کی تنصیبات پر 5 روز کے لئے حملے روکنے کا کہہ رہا ہوں، اس دوران مذاکرات کا عمل جاری رہے گا، یہ فیصلہ جاری بات چیت کی کامیابی سے مشروط ہے اور اگر مذاکرات مثبت سمت میں آگے بڑھتے رہے تو مزید پیش رفت کا امکان ہے۔
ڈونلڈ ٹرمپ کا کہنا تھا کہ ایران کے قابل احترام اعلیٰ رہنما سے بات چیت ہوئی، امید ہے ایران کے مسئلے کو حل کیا جا سکتا ہے،نہیں جانتا ایران کے سپریم لیڈر زندہ ہیں یا نہیں، میں نہیں چاہتا سپریم لیڈر مجتبیٰ خامنہ ای کو نشانہ بنایا جائے۔
انہوں نے کہا کہ ایران افزودہ یورینیم میرے حوالے کر دے،کبھی دوبارہ اسے حاصل نہ کرے، ایٹمی ہتھیار نہیں چاہتے،صرف مشرق وسطیٰ میں امن چاہتے ہیں، اگر ایران کے پاس جوہری ہتھیار ہوتے تو وہ مشرق وسطیٰ پرقبضہ کر لیتا۔
امریکی صدر کا کہنا تھا کہ پاور پلانٹس پر حملے ملتوی کیے جس کا دارومدار مذاکرات کی کامیابی پر ہے، تفصیلی اورتعمیری بات چیت پورے ہفتے جاری رہے گی، معاہدے کی ضمانت نہیں دے سکتا لیکن ہم اس پر کام کر رہے ہیں۔
ڈونلڈ ٹرمپ نے کہا کہ اگر معاہدہ ہوا تو یہ خطے اور ایران کیلئے بہت شاندار ہو گا، اسرائیل سے بات ہوگئی ہے،وہ اس پیشرفت سے خوش ہے۔
یاد رہے کہ گزشتہ روز امریکی صدر ڈونلڈ ٹرمپ نے بین الاقوامی بحری تجارتی گزرگاہ آبنائے ہرمز کھولنے کیلیے ایران کو 48 گھنٹے کا الٹی میٹم دیا تھا۔
یہ بھی پڑھیں: ٹرمپ نے ایران کے بعد امریکا کے سب سے بڑے دشمن کا نام بتا دیا
امریکی صدر نے ٹروتھ سوشل میڈیا پر جاری اپنے بیان میں کہا کہ اگر آبنائے ہرمز 48 گھنٹوں میں نہ کھولی گئی تو ایران کے پاور پلانٹس کو تباہ کر دیں گے، امریکا ایران کے پاور پلانٹس کو مرحلہ وار تباہ کرے گا اور سب سے پہلے اس کے بڑے پاور پلانٹ کو تباہ کیا جائے گا۔
دوسری جانب ایرانی پاسداران انقلاب نے امریکی صدر کی دھمکیوں ردعمل دیتے ہوئے واضح کیا تھا کہ بجلی تنصیبات کو نشانہ بنایا گیا تو اسرائیلی بجلی گھرسمیت امریکی اڈوں کوبجلی فراہم کرنے والے پاور پلانٹس کونشانہ بنایا جائے گا، ایرانی ساحل یا جزائر پر حملہ ہوا تو خلیج فارس میں تمام مواصلاتی راستوں کو بارودی سرنگوں سے بھر دیا جائے گا۔
