خبر ایجنسی کے مطابق فی الحال نطنز جوہری تنصیب پر تابکاری اثرات کی اطلاعات نہیں ہیں اور نہ ہی اطراف کے علاقوں کے رہائشیوں کو کوئی اطلاع فراہم کی گئی ہے۔
ایران کی جوہری توانائی ایجنسی نے نطنز تنصیب پر امریکی اور اسرائیلی حملے کی مذمت کرتے ہوئے کہا ہے کہ یہ حملہ این پی ٹی معاہدے کی سنگین خلاف ورزی ہے۔
ایران نے بین الاقوامی ایٹمی توانائی ایجنسی کو حملے سے متعلق آگاہ کر دیا، آئی اے ای اے نے کہا کہ نطنز جوہری تنصیب کے مقام پر تابکاری کی سطح میں اضافے کی اطلاع نہیں،واقعہ کا جائزہ لے رہے ہیں۔
یہ بھی پڑھیں: ایران کا اسرائیل کے بن گوریان ایئرپورٹ پر ڈرون حملہ
دوسری جانب روس نے ایرانی جوہری تنصیب پر اسرائیلی و امریکی حملے کی مذمت کی، روسی وزارت خارجہ کی جانب سے جاری بیان میں کہا گیا ہے کہ نطنز جوہری تنصیب پر حملہ عالمی قانون کی خلاف ورزی ہے۔
واضح رہے کہ گزشتہ سال جون میں امریکا نے ایران کی تین جوہری تنصیبات پر حملہ کیا تھا، نطنز، فردو اور اصفہان میں تنصیبات کو نشانہ بنایا گیا تھا۔
