سعودی وزارت صحت نے رواں برس اندرون مملکت سے حج کرنے والے عازمین اور صحت کے متعلقہ اہلکاروں کے لیے لازمی ویکسینیشن کی ہدایت جاری کر دی اور کہا کہ سیزنل فلو اور گردن توڑ بخار (منیناجائٹس) کی ویکسین لازمی طور پر لگانا ضروری ہے تاکہ عازمین مناسک حج کی ادائیگی میں بیماریوں سے محفوظ رہ سکیں۔
یہ بھی پڑھیں: امریکہ نے ایران کیخلاف آپریشن شروع کر دیا: ڈونلڈ ٹرمپ
سعودی وزارت صحت نے واضح کیا کہ گزشتہ پانچ سال میں گردن توڑ بخار کی ویکسین نہ لگوانے والے افراد کے لیے ویکسین لگانا لازمی ہوگا اور اس کا ریکارڈ صحتی ایپ پر اپ ڈیٹ ہونا ضروری ہے۔ وزارت نے تمام مستحقین کو ہدایت دی کہ وہ ویکسین لگانے کے لیے صحتی ایپ کے ذریعے وقت حاصل کریں تاکہ مقررہ کورس مکمل کیا جا سکے۔
حکام کے مطابق یہ اقدام نہ صرف حج کے دوران عازمین کی صحت کو محفوظ بنائے گا بلکہ مناسک کی ادائیگی کو بھی بے خطر و پرسکون بنانے میں مددگار ثابت ہو گا۔ انہوں نے عازمین سے اپیل کی کہ وہ ہدایات پر مکمل عمل کریں اور بروقت ویکسینیشن کروائیں تاکہ موسم حج میں کسی بھی طبی پیچیدگی سے بچا جا سکے۔
یاد رہے 2025 میں بھی ویکسینیشن لازمی قرار دی گئی تھی جبکہ 65 سال سے زائد عمر کے عازمین کو کورونا ویکسین بھی لگائی گئی تھی۔
