پاکستان ایئرپورٹس اتھارٹی نے مسافروں کی سہولت کیلئے اہم قدم اٹھاتے ہوئے اسلام آباد انٹرنیشنل ایئرپورٹ پر فائیو جی سروسز کا باقاعدہ آغاز کر دیا ہے جس کے بعد یہ ملک کا پہلا ایئرپورٹ بن گیا ہے جہاں یہ جدید سہولت دستیاب ہے۔
حکام کے مطابق نجی ٹیلی کام زونگ کے تعاون سے متعارف کروائی گئی اس سروس کے ذریعے مسافروں کو انتہائی تیز رفتار انٹرنیٹ اور ڈیجیٹل سہولیات فراہم کی جارہی ہیں۔
یہ بھی پڑھیں: مختلف شہروں کو جانے والی متعدد ٹرینوں کے شیڈول میں تاخیر
ائیرپورٹ انتظامیہ کا کہنا ہے کہ اس اقدام سے مسافروں کے سفر کا تجربہ بہتر ہو گا اور فائیو جی نیٹ ورک سروس کے ذریعے صارفین تیز رفتار براؤزنگ، فوری ڈیٹا ٹرانسفر اور بلا تعطل کنیکٹیویٹی سے فائدہ اٹھا سکیں گے۔
پاکستان ایئرپورٹس اتھارٹی کے مطابق اسلام آباد ائیرپورٹ پر آنے والے مسافر پہلے ہی اس سہولت سے مستفید ہونا شروع ہو چکے ہیں جبکہ مستقبل میں دیگر ایئرپورٹس پر بھی ایسی سہولیات متعارف کرانے پر غور کیا جائے گا۔
