کرسٹیانو رونالڈو اور جارجینا کی شادی، تاریخ سامنے آگئی
برطانوی میڈیا رپورٹس کے مطابق رونالڈو اور جارجینا نے پرتگال کے خوبصورت جزیرے ماڈیرا میں شادی کی منصوبہ بندی کی ہے، جو کرسٹیانو رونالڈو کی جائے پیدائش بھی ہے۔
رپورٹس میں دعویٰ کیا گیا ہے کہ شادی کی تقریب 8 اگست کو متوقع ہے، جس کے باعث کھیل اور شوبز حلقوں میں اس خبر نے خاصی توجہ حاصل کر لی ہے۔
میڈیا رپورٹس کے مطابق شادی کی مرکزی تقریب ماڈیرا کے دارالحکومت فنچل میں واقع تاریخی فنچل کیتھیڈرل میں منعقد ہونے کا امکان ہے، جبکہ اس کے بعد مہمانوں کے اعزاز میں ساوائے پیلس فائیو اسٹار ہوٹل میں شاندار استقبالیہ دیا جائے گا۔
واضح رہے کہ کرسٹیانو رونالڈو اور جارجینا روڈریگز کئی برسوں سے ایک دوسرے کے ساتھ ہیں اور ان کے تعلقات دنیا بھر میں مداحوں کی دلچسپی کا مرکز رہے ہیں۔
گزشتہ سال رونالڈو نے تقریباً آٹھ سالہ رفاقت کے بعد جارجینا کو ایک قیمتی ہیرے کی انگوٹھی پہنا کر شادی کی پیشکش کی تھی، جسے انہوں نے قبول کر لیا تھا۔
جارجینا روڈریگز نے اپنی انسٹاگرام پوسٹ میں منگنی کی انگوٹھی کی تصویر بھی شیئر کی تھی، جس میں ان کا ہاتھ رونالڈو کے ہاتھ پر رکھا ہوا تھا اور ان کی ہیرے کی انگوٹھی نمایاں دکھائی دے رہی تھی۔
یہ بھی پڑھیں:معروف کبڈی کھلاڑی کی اہلیہ نے خودکشی کر لی
اگرچہ برطانوی میڈیا میں شادی کی تاریخ اور مقام سے متعلق دعوے کیے جا رہے ہیں، تاہم کرسٹیانو رونالڈو اور جارجینا روڈریگز نے ابھی تک ان اطلاعات کی باضابطہ تصدیق نہیں کی ہے۔ مداح اب دونوں کی جانب سے سرکاری اعلان کے منتظر ہیں۔
