شادی کی تقریبات میں صرف ایک ڈش کی اجازت، وفاقی حکومت کا نیا حکم جاری
تفصیلات کے مطابق کابینہ ڈویژن کی جانب سے جاری نوٹیفکیشن کے تحت شادی کی تمام تقریبات میں صرف ایک ڈش پیش کرنے کی اجازت ہوگی، جبکہ دیگر تقریبات پر بھی کفایت شعاری کے نئے قواعد لاگو ہوں گے۔
نوٹیفکیشن کے مطابق سفارتی تقریبات کے علاوہ سرکاری ضیافتوں پر بھی پابندی عائد کردی گئی ہے۔ غیر ملکی وفود کے اعزاز میں دی جانے والی ضیافتیں اس پابندی سے مستثنیٰ ہوں گی۔
یہ بھی پڑھیں: چھوٹے کاروباری حضرات کیلئے بڑی سہولت، لاکھوں روپے تک فنانسنگ کی منظوری
حکومت نے سرکاری مالی اعانت سے ہونے والے سیمینارز، تربیتی نشستوں اور کانفرنسوں کے انعقاد کو بھی روک دیا ہے۔ تاہم ایسی اہم سرکاری تقریبات جن کا انعقاد ناگزیر ہو، انہیں صرف سرکاری ہالز، آڈیٹوریمز اور کمیٹی رومز میں منعقد کرنے کی ہدایت کی گئی ہے۔
نئے قواعد سے استثنیٰ حاصل کرنے کے لیے موصول ہونے والی درخواستوں کا انفرادی طور پر جائزہ ایک قائم کردہ مانیٹرنگ کمیٹی لے گی، جو اپنی سفارشات حتمی منظوری کے لیے وزیراعظم کو پیش کرے گی۔
وفاقی حکومت کے مطابق ان اقدامات کا مقصد سرکاری اخراجات میں کمی اور معاشی کفایت شعاری کو یقینی بنانا ہے۔
