ورلڈ کپ ہیرو مچل ڈیوک نے انٹرنیشنل فٹبال کو الوداع کہہ دیا
34 سالہ فارورڈ نے کئی برسوں تک آسٹریلوی قومی ٹیم کی نمائندگی کرتے ہوئے اہم مواقع پر اپنی ٹیم کیلئے نمایاں کردار ادا کیا۔
مچل ڈیوک کو سب سے زیادہ شہرت فیفا ورلڈ کپ 2022 میں قطر کے میدانوں پر ڈنمارک کیخلاف کیے گئے تاریخی گول سے ملی۔ گروپ مرحلے کے اس فیصلہ کن مقابلے میں ان کے واحد گول نے آسٹریلیا کو 12 برس بعد ورلڈ کپ میں پہلی کامیابی دلائی۔
اس تاریخی فتح کی بدولت آسٹریلوی ٹیم پری کوارٹر فائنل (راؤنڈ آف 16) تک رسائی حاصل کرنے میں بھی کامیاب رہی، جسے ملکی فٹبال کی ایک بڑی کامیابی قرار دیا گیا۔
اپنے بین الاقوامی کیریئر کے دوران مچل ڈیوک نے آسٹریلیا کیلئے 50 میچز کھیلے اور 13 گول اسکور کیے۔ وہ اپنی محنت، قائدانہ صلاحیتوں اور اہم مواقع پر شاندار کارکردگی کے باعث ٹیم کے قابلِ اعتماد کھلاڑیوں میں شمار ہوتے رہے۔
آسٹریلوی فٹبال فیڈریشن نے مچل ڈیوک کی قومی ٹیم کیلئے خدمات کو زبردست خراجِ تحسین پیش کرتے ہوئے کہا کہ انہوں نے ہمیشہ ملک کی نمائندگی فخر اور جذبے کے ساتھ کی، ان کی ورلڈ کپ میں کارکردگی آسٹریلوی فٹبال کی تاریخ کا ایک ناقابلِ فراموش لمحہ رہے گی۔
دوسری جانب مداحوں اور سابق کھلاڑیوں نے بھی سوشل میڈیا پر مچل ڈیوک کیلئے نیک تمناؤں کا اظہار کرتے ہوئے ان کے یادگار کیریئر کو سراہا، شائقین کا کہنا ہے کہ وہ نہ صرف ایک بہترین اسٹرائیکر بلکہ نوجوان فٹبالرز کیلئے ایک متاثر کن مثال بھی رہے ہیں۔
یہ بھی پڑھیں:آسٹریلیا کے معروف فٹبالر ٹیٹے ینگی نے اسلام قبول کر لیا
مچل ڈیوک کی ریٹائرمنٹ کے ساتھ آسٹریلیا کے ایک ایسے کھلاڑی کا بین الاقوامی سفر اختتام پذیر ہوا ہے جس نے اہم مقابلوں میں اپنی کارکردگی سے قوم کو کئی یادگار لمحات دیے اور قومی ٹیم کی کامیابیوں میں نمایاں کردار ادا کیا۔
