پاک ویسٹ انڈیز ٹیسٹ سیریز کا شیڈول سامنے آگیا

شیڈول کے مطابق پاکستان کرکٹ ٹیم آئندہ ماہ جولائی میں ویسٹ انڈیز کا دورہ کرے گی جہاں دونوں ٹیمیں آئی سی سی ورلڈ ٹیسٹ چیمپئن شپ کے تحت دو اہم ٹیسٹ میچز میں مدِمقابل آئیں گی۔

جاری کردہ شیڈول کے مطابق پاکستان اور ویسٹ انڈیز کے درمیان پہلا ٹیسٹ میچ 25 جولائی سے شروع ہو گا جبکہ دوسرا اور آخری ٹیسٹ 2 اگست سے کھیلا جائے گا۔

دونوں میچز ویسٹ انڈیز کے جزیرہ ملک ٹرینیڈاڈ اینڈ ٹوبیگو میں مختلف سٹیڈیمز پر منعقد کیے جائیں گے۔

پاکستانی ٹیم کے لیے یہ سیریز ورلڈ ٹیسٹ چیمپئن شپ کے تناظر میں انتہائی اہم قرار دی جا رہی ہے کیونکہ دونوں ٹیمیں قیمتی پوائنٹس حاصل کرنے کی کوشش کریں گی۔

پاکستان ٹیم حالیہ عرصے میں ٹیسٹ کرکٹ میں اتار چڑھاؤ کا شکار رہی ہے جبکہ ویسٹ انڈیز بھی ہوم گراؤنڈ پر بہتر کارکردگی دکھانے کے لیے پُرعزم ہے۔

یہ بھی پڑھیں: آسٹریلیا کیخلاف ون ڈے سیریز کیلئے قومی سکواڈ کا اعلان

کرکٹ شائقین کو اس سیریز میں دلچسپ اور سنسنی خیز مقابلوں کی توقع ہے، خاص طور پر ٹرینیڈاڈ کی وکٹیں ہمیشہ سے فاسٹ باؤلرز اور اسپنرز دونوں کے لیے مددگار سمجھی جاتی رہی ہیں۔

ذرائع کے مطابق پاکستان کرکٹ بورڈ اور کرکٹ ویسٹ انڈیز کی جانب سے سیریز کے انتظامات کو حتمی شکل دی جا رہی ہے جبکہ دونوں ٹیموں کے اسکواڈز کا اعلان بھی جلد متوقع ہے۔