پی سی بی کے سینئر اسکورر نجم السعید چل بسے
ان کے انتقال کی خبر سے کھیلوں کے حلقوں اور کرکٹ سے وابستہ افراد میں گہرے دکھ اور افسوس کی لہر دوڑ گئی ہے۔
مرحوم کے بیٹے محمد شاہزیب نے والد کے انتقال کی تصدیق کرتے ہوئے بتایا کہ نجم السعید دل کا دورہ پڑنے کے باعث انتقال کر گئے۔ ان کے انتقال پر اہل خانہ، دوستوں اور کرکٹ کمیونٹی کی جانب سے تعزیت کا اظہار کیا جا رہا ہے۔
واضح رہے کہ نجم السعید پاکستان کرکٹ میں ایک طویل عرصے تک خدمات انجام دیتے رہے، انہیں ایک تجربہ کار اور باصلاحیت اسکورر کے طور پر جانا جاتا تھا۔
انہوں نے حال ہی میں پاکستان سپر لیگ میں بھی اسکورر کے فرائض سرانجام دیے تھے، جہاں ان کی پیشہ ورانہ صلاحیتوں کو سراہا جاتا تھا۔
رپورٹس کے مطابق نجم السعید نے کئی برسوں تک ٹیسٹ، ون ڈے اور ٹی ٹوئنٹی انٹرنیشنل میچز میں آفیشل اسکورر کے طور پر خدمات انجام دیں، ان کی وابستگی اور تجربہ پاکستان کرکٹ کیلئے ایک اہم اثاثہ سمجھا جاتا تھا۔
یہ بھی پڑھیں:شائقین پاکستان آسٹریلیا ون ڈے سیریز مفت کہاں دیکھ سکیں گے؟
کھیلوں کے مبصرین کے مطابق نجم السعید کا انتقال پاکستان کرکٹ کیلئے ایک بڑا نقصان ہے کیونکہ انہوں نے اپنی پیشہ ورانہ ذمہ داریوں کے ذریعے کھیل کے انتظامی شعبے میں نمایاں کردار ادا کیا۔
کرکٹ شائقین اور مختلف شخصیات کی جانب سے مرحوم کیلئے دعائے مغفرت اور اہل خانہ کیلئے صبرِ جمیل کی دعا کی جا رہی ہے۔
