شائقین پاکستان آسٹریلیا ون ڈے سیریز مفت کہاں دیکھ سکیں گے؟

پاکستان اور آسٹریلیا کے درمیان تین میچوں پر مشتمل ون ڈے انٹرنیشنل سیریز 30 مئی سے 4 جون تک کھیلی جائے گی، سیریز کے میچز راولپنڈی اور لاہور میں شیڈول ہیں جہاں دونوں ٹیمیں ایکشن میں دکھائی دیں گی۔

پاکستان کرکٹ بورڈ کے مطابق شائقین اس اہم سیریز کے تمام میچز مفت میں پی سی بی لائیو پر دیکھ سکیں گے، پاکستان میں اس سیریز کی واحد لائیو اسٹریمنگ پلیٹ فارم پی سی بی لائیو ہو گی جس کے ذریعے کرکٹ فینز موبائل، کمپیوٹر یا دیگر ڈیجیٹل ڈیوائسز پر میچز براہِ راست دیکھ سکیں گے۔

شائقین آئی فون کے لیے ایپ اسٹور جبکہ اینڈرائیڈ صارفین گوگل پلے اسٹور سے پی سی بی لائیو ایپ ڈاؤن لوڈ کر سکتے ہیں، اس کے علاوہ آنے والی سیریز کے لیے ویب سائٹ live.pcb.com.pk پر بھی رجسٹریشن کی سہولت دستیاب ہو گی۔

پی سی بی کی او ٹی ٹی سروس گزشتہ سال اکتوبر میں شروع کی گئی تھی جو ابتدائی طور پر صرف برطانیہ میں دستیاب تھی تاہم اب اس پلیٹ فارم کے ذریعے پاکستان میں بھی شائقین کو براہِ راست کرکٹ ایکشن دیکھنے کا موقع فراہم کیا جا رہا ہے۔

یہ بھی پڑھیں: پاک آسٹریلیا ون ڈے سیریز، ٹکٹس کی فروخت کا شیڈول جاری

کرکٹ شائقین کے لیے یہ سیریز خاص اہمیت رکھتی ہے کیونکہ پاکستان اور آسٹریلیا کے درمیان مقابلے ہمیشہ دلچسپ اور سنسنی خیز رہے ہیں۔

دونوں ٹیموں کے درمیان سخت مقابلے کی توقع کی جا رہی ہے جبکہ شائقین کو گھر بیٹھے مفت لائیو اسٹریمنگ کی سہولت ملنا ایک بڑی سہولت قرار دی جا رہی ہے۔