پاکستان کرکٹ بورڈ کی جانب سے جاری کردہ اعلامیے کے مطابق سلمان علی آغا بنگلہ دیش کیخلاف ٹی 20 سیریز میں پاکستانی ٹیم کی کپتانی کے فرائض سرانجام دیں گے۔
پاکستان اور بنگلا دیش کے درمیان تین ٹی 20 میچز 20 سے 24 جولائی تک ڈھاکہ میں کھیلے جائیں گے۔
پاکستان کرکٹ ٹیم 16 جولائی کو بنگلا دیش پہنچے گی جہاں دونوں ٹیموں کے مابین ٹی 20 سیریز کا آغاز 20 جولائی سے ہوگا۔
جاری کردہ شیڈول کے مطابق پہلا ٹی ٹوئنٹی میچ 20 جولائی کو ڈھاکہ، دوسرا میچ 22 جولائی جبکہ تیسرا میچ 24 جولائی کو شیڈول ہے۔
واضح رہے کہ دورہ بنگلا دیش اور ویسٹ انڈیز کیلئے پاکستان کرکٹ اسکواڈ کا تربیتی کیمپ بدھ سے شروع ہوگا، نیشنل بنک اسٹیڈیم میں منعقد ہونے والے کیمپ کیلئے ممکنہ کھلاڑی آج (منگل) کو رپورٹ کریں گے۔تربیتی کیمپ 15 جولائی تک جاری رہے گا، پاکستان کرکٹ ٹیم اگلے روز 16 جولائی کو ڈھاکہ پہنچے گی، دورہ بنگلا دیش کے بعد پاکستان ٹیم امریکہ کیلئے روانہ ہوگی۔
یہ بھی پڑھیں:دورہ منسوخ، بھارتی کرکٹ بورڈ کا ٹیم بنگلہ دیش نہ بھیجنے کا اعلان
ذہن نشین رہے کہ پاکستان اور ویسٹ انڈیز کے درمیان 3 میچز پر مشتمل ٹی 20 سیریز فلوریڈا میں یکم تا 4 اگست کھیلی جائے گی، بعدازاں دونوں ممالک کے درمیان ون ڈے سیریز 8 سے 12 اگست تک ٹرینیڈاڈ اینڈ ٹوباگو میں منعقد ہوگی۔
پاکستان سکواڈ برائے بنگلہ دیش سیریز:
سلمان علی آغا (کپتان)، ابرار احمد، احمد دانیال، فہیم اشرف، فخر زمان، حسن نواز، حسین طلعت، خوشدل شاہ، محمد عباس آفریدی، محمد حارث (وکٹ کیپر)، محمد نواز، صاحبزادہ فرحان (وکٹ کیپر)، صائم ایوب، سلمان مرزا اور سفیان مقیم۔
