یہ افسوسناک واقعہ ڈی اے وی اسکول گراؤنڈ میں جاری ایک مقامی ٹورنامنٹ کے دوران پیش آیا۔ سوشل میڈیا پر وائرل ویڈیو میں واضح طور پر دیکھا جا سکتا ہے کہ ہرجیت سنگھ نے ایک شاندار چھکا مارا، جس کے بعد وہ دوسرے اینڈ پر موجود بلے باز کے ساتھ خوشی منانے کیلئے دوڑے، لیکن اچانک وہ گھٹنوں کے بل بیٹھ گئے اور زمین پر گر پڑے۔

یہ صورتحال دیکھ کر ساتھی کھلاڑی فوراً ان کے پاس پہنچے اور مدد فراہم کرنے کی کوشش کی۔ انہیں فوری طور پر CPR (دل کی دھڑکن بحال کرنے کی تکنیک) دی گئی، لیکن بدقسمتی سے وہ ہوش میں نہ آ سکے۔ بعد ازاں ڈاکٹروں نے ان کی موت کی تصدیق کرتے ہوئے بتایا کہ ان کا انتقال دل کا شدید دورہ پڑنے سے ہوا۔

یہ بھی پڑھیں:ایشیا کپ 2025 کا ممکنہ شیڈول سامنے آ گیا

یاد رہے کہ یہ پہلا واقعہ نہیں، اس سے قبل 2024ء میں بھی پونے شہر میں ایسا ہی سانحہ پیش آ چکا ہے، جب 35 سالہ کرکٹر عمران پٹیل مقامی میچ کھیلتے ہوئے دل کی تکلیف کے باعث گر کر جاں بحق ہو گئے تھے۔ عمران پٹیل ایک مکمل فٹ آل راؤنڈر تھے، جس وجہ سے ان کی موت نے بھی سب کو حیران کر دیا تھا۔

طبی ماہرین کا کہنا ہے کہ حالیہ برسوں میں نوجوان کھلاڑیوں میں دل کے دورے کے واقعات میں اضافہ دیکھنے میں آ رہا ہے۔ گرمی، شدید جسمانی دباؤ، پانی کی کمی اور دل کی پوشیدہ بیماریاں اس کے اہم اسباب ہو سکتے ہیں۔