پاکستان کرکٹ بورڈ کی جانب سے جاری کردہ شیڈول کے مطابق پاکستان کرکٹ ٹیم 16 جولائی کو بنگلادیش پہنچے گی، جہاں دونوں ٹیموں کے مابین ٹی20 سیریز کا آغاز 20 جولائی سے ہو گا۔
شیڈول کے مطابق پہلا ٹی20 میچ 20 جولائی کو ڈھاکا میں کھیلا جائے گا، دوسرا میچ 22 جولائی، جبکہ تیسرا میچ 24 جولائی کو شیڈول ہے۔ تین میچوں پر مشتمل اس سیریز کو دونوں ٹیموں کی تیاریوں اور کارکردگی کا اہم امتحان قرار دیا جا رہا ہے۔
واضح رہے کہ پاکستانی ٹیم بنگلادیش کی کنڈیشنز میں اپنے کھیل کو بہتر بنانے اور سیریز میں فتح حاصل کرنے کی خواہش مند ہے۔ دوسری جانب بنگلادیشی ٹیم بھی ہوم گراؤنڈ کا بھرپور استعمال کرتے ہوئے پاکستان کو سخت چیلنج دینے کا عزم رکھتی ہے۔
یہ بھی پڑھیں:پاکستان نیشنز ہاکی کپ کے فائنل میں پہنچ گیا
کرکٹ مبصرین کے مطابق دونوں ٹیموں کا ماضی کا ریکارڈ اور حالیہ کارکردگی اس سیریز کو دلچسپ اور سنسنی خیز بنا سکتی ہے۔ ٹی20 فارمیٹ میں بنگلادیش کی ٹیم ہمہ وقت خطرہ ثابت ہو سکتی ہے، جبکہ پاکستان کی ٹیم میں بابر اعظم، محمد رضوان اور شاہین آفریدی جیسے مایہ ناز کھلاڑی موجود ہیں۔
شائقین کرکٹ اس سیریز کا بے تابی سے انتظار کر رہے ہیں۔ توقع ہے کہ دونوں ٹیموں کی جانب سے سخت مقابلے دیکھنے کو ملیں گے، اور میدان میں جارحانہ کرکٹ کا مظاہرہ ہو گا۔
خیال رہے کہ اس سیریز کا مقصد دونوں ٹیموں کی صلاحیتوں کو مزید نکھارنا اور آنے والے بڑے ایونٹس کی تیاری کو بہتر بنانا ہے۔
