پاکستان کے کئی شہروں میں زلزلے کے شدید جھٹکے
زلزلے کے جھٹکے خیبر پختونخوا کے مختلف علاقوں میں محسوس کیے گئے، جن میں بٹگرام، نوشہرہ، خیبر، ایبٹ آباد، چترال، بونیر، لوئر دیر، اپر دیر اور سوات سمیت گردونواح کے علاقے شامل ہیں۔
زلزلہ پیما مرکز کے مطابق ریکٹر اسکیل پر زلزلے کی شدت 5.3 ریکارڈ کی گئی، جبکہ اس کی گہرائی 84 کلومیٹر زیر زمین تھی۔ زلزلے کا مرکز کوہ ہندوکش کا پہاڑی سلسلہ بتایا گیا ہے۔
زلزلے کے اچانک جھٹکوں سے شہری خوفزدہ ہوگئے اور گھروں، دفاتر اور دیگر عمارتوں سے باہر کھلی جگہوں کا رخ کیا۔ اس دوران شہریوں کی بڑی تعداد کلمہ طیبہ کا ورد کرتی رہی۔
ابتدائی اطلاعات کے مطابق زلزلے کے نتیجے میں کسی جانی یا مالی نقصان کی اطلاع موصول نہیں ہوئی، تاہم مختلف علاقوں میں زلزلے کے جھٹکوں کے باعث شہریوں میں تشویش پائی جاتی ہے۔
متعلقہ انتظامیہ اور امدادی ادارے صورتحال پر نظر رکھے ہوئے ہیں، جبکہ متاثرہ علاقوں سے کسی بڑے نقصان کی اطلاع سامنے نہیں آئی۔
یہ بھی پڑھیں:مولانا فضل الرحمان کی حمایت میں جے یو آئی سڑکوں پر نکل آئی
واضح رہے کہ کوہ ہندوکش کا پہاڑی سلسلہ زلزلے کی سرگرمیوں کے حوالے سے اہم خطہ سمجھا جاتا ہے، جہاں زیر زمین ارضیاتی تبدیلیوں کے باعث وقتاً فوقتاً زلزلے آتے رہتے ہیں۔