سینئر رہنما پی ٹی آئی سینیٹر خرم زیشان کا مستعفی ہونے کا اعلان
سوشل میڈیا پلیٹ فارم ایکس پر جاری اپنے ویڈیو بیان میں خرم زیشان نے کہا کہ انہوں نے پارٹی عہدے اور سینیٹ کی نشست سے استعفیٰ دینے کا فیصلہ کیا ہے اور وہ اپنا استعفیٰ کل پارٹی چیئرمین، جنرل سیکرٹری، اپوزیشن لیڈر اور پارلیمانی لیڈر کو ارسال کر دیں گے۔
انہوں نے واضح کیا کہ پارٹی قیادت کی ہدایت پر وہ خود سینیٹ میں حاضر ہو کر چیئرمین سینیٹ کے سامنے استعفے سے متعلق تمام قانونی تقاضے پورے کریں گے۔
خرم زیشان کا کہنا تھا کہ اگر پارٹی قیادت یہ فیصلہ کرتی ہے کہ بانی پی ٹی آئی عمران خان کی خاطر انہیں اپنا ووٹ استعمال کرنا ہے اور ان کا استعفیٰ قبول نہیں کیا جاتا تو بھی ان کا ووٹ عمران خان کی امانت ہے، جس میں وہ خیانت نہیں کریں گے۔
انہوں نے مزید کہا کہ وہ مستقبل میں سینیٹ یا کسی دوسرے انتخاب میں پارٹی ٹکٹ کے خواہشمند نہیں ہیں۔ وہ صرف ایک عام پارٹی کارکن اور پاکستانی کی حیثیت سے عمران خان کی جدوجہد میں ان کے ساتھ کھڑے رہیں گے۔
یہ بھی پڑھیں:اڈیالہ جیل میں ہونے والی ملاقات سازش ہے،نعیم پنجوتھا
گولڈ مائننگ کے الزامات پر ردعمل دیتے ہوئے سینیٹر خرم زیشان نے کہا کہ الزام لگانے والوں کیخلاف ہتک عزت کی کارروائی کیلئے وکلا سے مشاورت کریں گے اور آئندہ چند روز میں قانونی نوٹس بھی بھجوایا جائے گا۔