اڈیالہ جیل میں ہونے والی ملاقات سازش ہے،نعیم پنجوتھا
اپنے بیان میں نعیم پنجوتھا نے کہا کہ ایک مخصوص ایجنڈے کے تحت انتظار پنجوتھا کے خلاف منصوبہ بندی کی گئی اور اس معاملے پر مسلسل گمراہ کیا جاتا رہا۔
انہوں نے دعویٰ کیا کہ بانی پاکستان تحریک انصاف عمران خان نہ تو اس روز اور نہ ہی اس سے پہلے انتظار پنجوتھا کو ہٹانا چاہتے تھے، اس حوالے سے سامنے آنے والی صورتحال حقائق کے برعکس ہے۔
نعیم پنجوتھا کا کہنا تھا کہ اب جو بھی بات ہوگی، وہ براہ راست بانی پی ٹی آئی سے کی جائے گی، بس اس کیلئے مناسب وقت کا انتظار ہے۔
پی ٹی آئی رہنما نے اپنے بیان میں پارٹی کی موجودہ صورتحال پر افسوس کا اظہار کرتے ہوئے کہا کہ بانی پی ٹی آئی کو جیل سے باہر نکالنے کی کوششیں کرنے کے بجائے یہاں اپنے ہی لوگوں کی ٹانگیں کھینچی جا رہی ہیں۔
انہوں نے مزید کہا کہ پارٹی رہنما بانی پی ٹی آئی کے ساتھ کھڑے ہیں اور ان کی رہائی کیلئے اپنی جدوجہد جاری رکھیں گے۔
نعیم پنجوتھا نے واضح کیا کہ ان کا اپنے قائد پر اعتماد برقرار ہے اور انہیں یقین ہے کہ عمران خان جلد جیل سے باہر آئیں گے۔
ان کے اس بیان کے بعد اڈیالہ جیل میں ملاقات اور انتظار پنجوتھا سے متعلق معاملات ایک بار پھر سیاسی بحث کا موضوع بن گئے ہیں۔
