سیکیورٹی فورسز کی کارروائیاں، 16 خوارج ہلاک، 2 جوان شہید
پاک فوج کے شعبہ تعلقات عامہ (آئی ایس پی آر) کے مطابق خیبرپختونخوا کے ضلع شمالی وزیرستان کے علاقوں میر علی، دتہ خیل اور گردونواح میں انٹیلی جنس بنیادوں پر کارروائیاں کی گئیں۔ گزشتہ 12 گھنٹوں کے دوران سیکیورٹی فورسز اور خوارج کے درمیان شدید فائرنگ کا تبادلہ ہوا۔
آئی ایس پی آر کے مطابق علی خیل میں 12 خوارج مارے گئے جن میں بھارتی سرپرستی میں سرگرم فتنۃ الخوارج سے تعلق رکھنے والے 2 افغان شہری بھی شامل ہیں، جبکہ میر علی اور دتہ خیل میں 2، 2 خوارج ہلاک ہوئے۔
ترجمان پاک فوج کے مطابق ان جھڑپوں میں 43 سالہ حوالدار عصمت علی (ضلع صوابی کے رہائشی) اور 32 سالہ نائیک آفتاب علی (ضلع مردان کے رہائشی) بہادری سے لڑتے ہوئے شہید ہوگئے۔
یہ بھی پڑھیں: شمالی کوریا کے پرچم میں 78 سال بعد بڑی تبدیلی
آئی ایس پی آر کے مطابق ہلاک خوارج سے اسلحہ اور گولہ بارود بھی برآمد کیا گیا، ہلاک دہشت گرد معصوم شہریوں کے قتل سمیت متعدد دہشت گردانہ کارروائیوں میں ملوث تھے۔
دریں اثنا وفاقی وزیرداخلہ محسن نقوی نے خیبرپختونخوا کے مختلف علاقوں میں خوارجیوں کے خلاف کامیاب آپریشنز پر سکیورٹی فورسز کی ستائش کی ہے، انہوں نے 16 خوارجیوں کو جہنم رسید کرنے پر سکیورٹی فورسز کے عزم اور پیشہ وارانہ صلاحیتوں کو سراہا۔
وفاقی وزیرداخلہ نے خوارجیوں کا بہادری سے مقابلہ کرتے ہوئے جام شہادت نوش کرنے والے نائیک آفتاب علی اور حولدار عصمت علی کو خراج عقیدت پیش کیا اور دونوں شہداء کے لواحقین سے دلی ہمدردی و تعزیت کا اظہار کیا۔
