شمالی کوریا کے پرچم میں 78 سال بعد بڑی تبدیلی
رپورٹس کے مطابق شمالی کوریا نے نئی آئینی ترمیم کے ذریعے قومی پرچم کی اونچائی اور چوڑائی کا تناسب تبدیل کیا ہے۔ نئے آئین میں یہ تناسب ایک اور 1.65 مقرر کیا گیا ہے، جبکہ اس سے قبل پرچم کی اونچائی اور چوڑائی کا تناسب ایک اور 2 تھا۔
شمالی کوریا کے سرکاری پروپیگنڈا ویب پورٹل نینارا پر شائع ہونے والے نئے آئین میں اس تبدیلی کی تفصیلات سامنے آئی ہیں۔ نئے آئین کے آرٹیکل 166 میں قومی پرچم کے سائز اور تناسب سے متعلق ترمیم شامل کی گئی ہے۔
اس تبدیلی کے نتیجے میں شمالی کوریا کا قومی پرچم اب پہلے کی نسبت زیادہ چوڑا اور کم لمبا دکھائی دے گا۔ تاہم پرچم کے بنیادی ڈیزائن اور روایتی رنگوں میں کوئی تبدیلی نہیں کی گئی۔
شمالی کوریا کے قومی پرچم میں درمیان میں سرخ رنگ کی ایک چوڑی پٹی موجود ہے، جس کے اوپر اور نیچے سفید رنگ کی باریک پٹیاں بنائی گئی ہیں، جبکہ دونوں جانب نیلے رنگ کی پٹیاں بھی شامل ہیں۔
واضح رہے کہ شمالی کوریا نے 1948 میں اپنے قیام کے بعد سے قومی پرچم کے بنیادی ڈیزائن کو برقرار رکھا تھا۔ اب تقریباً 78 سال بعد اس کے تناسب میں تبدیلی کو ایک اہم آئینی پیش رفت قرار دیا جارہا ہے۔
